Pas opozitës jashtëparlamentare, një ftesë e papritur e presidentit Ilir Meta ishte edhe ajo e drejtuar ndaj përfaqësuesve të Fondacionit të Shoqërisë së Hapur ‘Soros’ në Shqipëri.
Sipas burimeve nga presidenca, Meta takohet sot në 17.30 me përfaqësues të organizatave së shoqërisë civile të angazhuara me monitorimin e zbatimit të reformës në Drejtësi, mes tyre edhe përfaqësues të Fondacionit Shoqëria e Hapur Soros.
Kjo ftesë ka qenë befasuese pas deklaratave të forta të presidentit ndaj miliarderit Soros 4 muaj më parë, konkretisht dy ditë pas zgjedhjeve të 30 qershorit.
Duke kujtuar këshillën e Victor Urban, kryeministri i Hungarisë se duhet bërë kujdes prej Soros-it, Meta iu drejtua këtij të fundit se nuk rrjedh nga raca e ish kryeministrit maqedonas Nikola Gruevski, por është politikan i racës së Avni Rustemi, e Mic Sokoli.
“Kam dy fjalë për miliarderin Soros, ju uroj jetë të gjatë, suksese dhe të birit që vjen shpesh në Shqipëri, t’i gëzojë miliardat, Ilir Meta nuk është i racës së Gruevskit është presidenti i vendit dhe i del për zot vendit, Jam i racës së tipit Avni Rustemi, Mic Sokolit, Vojo Kushi”, u shpreh Meta.
Aktualisht situata është mjaft e tensionuar midis dy institucioneve, Presidencës dhe Parlamentit, me kreun e shtetit që ka kërcënuar se me një dekret do ta shpërndajë kuvendin, apo me një mocion mosbesimin rrëzimin e qeverisë.
Financuar Nga Bashkimi Europian
