Drejtuesi i Dioqezes së Rrëshenit, dom Gjergj Meta, ka bërë thirrje për qetësi me anë të një mesazhi në facebook, pas panikut që shkaktoi tërmeti 5.8 ballë që ra të shtunën, lëkundjet e të cilit vazhdojnë akoma të ndihen.
“Ne kemi në dorë të ndërtojmë marrëdhënie të mira me njëri-tjetrin: kjo është natyra jonë. Toka, universi ka ligjësitë e veta e i rregullon vetë. Po ta keni vënë re sot në mëngjes dielli ka lindur përsëri e toka rrotullohet rreth tij. E do të vazhdojë të jetë kështu”, shkruhet në mesazhin e dom Gjergj Metës.
Mesazhi i plotë:
Mos ta ngatërrojmë ligjësinë me ligësinë
Të dashur miq,
pas kësaj fundjave plot panik, i ligjshëm pjesërisht, por pjesërisht i pajustifikuar, sidomos kur përhapet nga njerëz të papërgjegjshëm, ndjej t’ju uroj një javë të bukur.
Jeta jetohet sot. E nesërmja nuk është në dorën tonë. Ta lëmë natyrën në ligjësinë e saj e të mos e kompromentojmë me ligësinë tonë. Ne kemi në dorë të ndërtojmë marrëdhënie të mira me njëri-tjetrin: kjo është natyra jonë. Toka, universi ka ligjësitë e veta e i rregullon vetë.
Po ta keni vënë re sot në mëngjes dielli ka lindur përsëri e toka rrotullohet rreth tij. E do të vazhdojë të jetë kështu.
Të marrim në dorë universin tonë njerëzor.
Ne kemi në dorë ta bëjmë dashurinë forcën tërheqëse të këtij universi njerëzor, duke dashur Zotin dhe njëri-tjetrin. Kështu do të krijojmë komunitet solidar që kthehet në shpresë për të gjithë dhe kemi shumë nevojë, sidomos në çaste të vështira.
Lart zemrat e vazhdojmë rrugëtimin!
Ditë të bukur
+ d. Gjergji
Financuar Nga Bashkimi Europian
