Flash News

Digjet makina në Belsh–Kuçovë, shpëton pa lëndime një familje prej pesë personash

Sulmohet në fytyrë kryetarja e bashkisë së Shkupit, dërgohet me urgjencë në spital

Zjarr në Pogradec, përfshihet nga flakët masivi pyjor

Incident në Theth, disa persona gjuajnë me molotovë fadromat e IKMT

Gazeta më e madhe izraelite shkruan për aktin e dëshmorit shqiptar, Arben Anamali

KRYESORE

Kërkon të ulet në krah të SHBA dhe Rusisë në OKB, Shqipëria nis 3 vite më herët lobimin për Këshillin e Sigurimit

Politiko 26 Shtator 2018, 10:01
Kërkon të ulet në krah të SHBA dhe Rusisë në OKB,

Delegacioni shqiptar që po merr pjesë në punimet e Asamblesë së Përgjithshme të OKB-së po lobon për të marrë mbështetjen për kandidaturën për në Këshillin e Sigurimit. Ministri i Jashtëm, Ditmir Bushati ka theksuar se Tirana kërkon një vend jo të përhershëm në Këshillin e Sigurimit të OKB-së, për periudhën 2022-2023.

Shqipëria është nga shtetet e pakta në Europë që nuk ka qenë asnjëherë në këtë pozicion të lartë të organizatës më të rëndësishme në botë, ndonëse është anëtare e saj prej dekadash.

Anëtarët jo-të përhershëm të Këshillit të Sigurimit

Këshilli i Sigurimit i OKB-së përbëhet nga 15 anëtarë, pesë prej tyre janë të përhershëm (SHBA, Rusi, Mbretëria e Bashkuar, Franca dhe Kina) dhe dhjetë zgjidhen nga 193 anëtarët e OKB-së për një mandat dy vjeçar. Zgjedhjet për anëtarët jo-të përhershëm zhvillohen çdo vit, me pesë fitues që zëvendësojnë pesë shtete që u ka mbaruar mandati si anëtare jo-të përhershme.

Në OKB funksionojnë katër grupe të mëdha, nga ku dalin edhe kandidatët.

Grupi i Afrikës zgjedh një përfaqësues, grupi i Azisë dhe Paqësorit zgjedh një përfaqësues, grupi i Amerikës Latine dhe Karaibeve zgjedh një përfaqësues, grupi i Evropës Lindore zgjedh një përfaqësues dhe grupi i Evropës Perëndimore zgjedh dy përfaqësues.

Aktualisht, grupi i Evropës Lindore ku bën pjesë edhe Shqipëria përfaqësohet nga Polonia, mandati i së cilës përfundon në vitin 2019-të. Ndërkohë, Holandës dhe Suedisë, që përfaqësojnë në Këshillin e Sigurimit grupin e Evropës Perëndimore, u përfundon këtë vit mandati dhe ato do të zëvendësohen nga Belgjika dhe Gjermania.

Këtë vit, kandidate për grupin e Afrikës është Afrika e Jugut, për Azi-Paqësorin janë në garë Maldivet dhe Indonezia, si dhe për Amerikën Latine kandidate është Republika Domenikane. Evropa lindore nuk ka kandidat këtë vit sepse mandati i Polonisë përfundon në 2019-ën, raporton Politiko.al.

Kandidatët për Evropën Lindore

Vitin e ardhshëm, grupi i Evropës Lindore do të zgjedhë shtetin që do e përfaqësojë për dy vjet në Këshillin e Sigurimit. Kandidaturat i kanë paraqitur Estonia dhe Rumania.

Ndonëse është herët për të folur për pozicionin që Shqipëria do të mbajë në vitin 2019-të, pala shqiptare do të marrë parasysh në zgjedhjen që do të bëjë raportet që ka me këto dy shtete. Estonia dhe Rumania janë të dyja anëtare të BE-së dhe NATO, ndërkohë që rumunët kanë avantazhin se janë pjesë një rajoni me shqiptarët dhe kanë marrëdhënie historike dhe ekonomike më të forta se ato që ekzistojnë me estonezët. Gjithsesi, ajo që e favorizon Estoninë për të marrë votën e Tiranës është fakti se ky shtet e njeh pavarësinë e Kosovës, ndërkohë që i njëjti vendim nuk është marrë nga Bukureshti, i cili muajt e fundit ka afruar qëndrimet me Serbinë sa i përket kësaj çështje.

Shqipëria dhe Këshilli i Sigurimit

Shqipëria është ndër të paktat shtete në Evropë dhe botë që është prej dekadash anëtare e OKB-së por që nuk ka arritur asnjëherë të zgjidhet anëtare jo-e përhershme e Këshillit të Sigurimit. Pjesë e këtij këshilli kanë qenë edhe shtete me peshë më të vogël se Shqipëria në arenën ndërkombëtare si Malta, Kape Verde, Burundi, Somalia etj.

Megjithatë, Shqipëria ka zyrtarizuar kandidaturën për zgjedhjet që do të zhvillohen në vitin 2021. Tirana është vetmja në garë për momentin nga grupi i Evropës Lindore dhe që do të kërkojë të zëvendësojë në Këshillin e Sigurimit fituesen e vitit 2019, një prej Estonisë dhe Rumanisë. Për të ulur në krah të më të fuqishmëve të botës, Shqipëria duhet të sigurojë më shumë se 120 vota në Asamblenë e Përgjithshme, ndaj puna e diplomacisë shqiptare ka nisur tre vite më herët./Politiko.al

Të fundit