Autoritetet në rajonin kinez të Mongolisë së Brendshme janë në gatishmëri pas një rasti të dyshuar të murtajës bubonike, sëmundja që shkaktoi pandeminë e Vdekjes së Zezë, raporton CNN.
Rasti u zbulua në qytetin e Bayannur, i vendosur në veri-perëndim të Pekinit, sipas agjencisë shtetërore të lajmeve Xinhua. Një spital paralajmëroi autoritetet komunale për çështjen e pacientit gjatë kësaj të shtune. Ndërkaq, ditën e dielë, autoritetet lokale kishin lëshuar një paralajmërim të nivelit 3 në të gjithë qytetin- i dyti më i ulët në një sistem me katër nivele-me qëllim marrjen e masave për parandalimin e murtajës.
Paralajmërimi do të qëndrojë në vend deri në fund të vitit, sipas Xinhua.
Murtaja shkaktohet nga bakteret dhe transmetohet përmes kafshimeve të pleshtave dhe kafshëve të infektuara. Ajo është një nga infeksionet më vdekjeprurëse bakteriale në historinë njerëzore. Gjatë kohës së Mesjetës, Vdekja e Zezë vrau rreth 50 milion njerëz në Evropë. Antibiotikët modernë mund të parandalojnë komplikimet dhe vdekjen nëse administrohen mjaft shpejt.
Murtaja bubonike, e cila është një nga tre format e murtajës, shkakton nyjet limfatike të dhimbshme, ënjtje, si dhe ethe, të dridhura dhe kollitje.
Autoritetet shëndetësore të Bayannur tani po u bëjnë thirrje njerëzve të marrin masa shtesë për të minimizuar rrezikun e transmetimit nga njeriu në njeri dhe për të shmangur gjuetinë ose ngrënien e kafshëve që mund të shkaktojnë infeksion.
“Aktualisht, ekziston rreziku i një përhapjeje të epidemisë njerëzore në këtë qytet. Publiku duhet të përmirësojë vetëdijësimin dhe aftësinë e tij për vetë-mbrojtje, dhe të raportojë menjëherë kushtet anormale të shëndetit”, tha autoriteti lokal shëndetësor, sipas gazetës shtetërore China Daily.
Autoritetet e Bayannur paralajmëruan publikun të raportojë gjetjet e marmotave të vdekura ose të sëmura – një lloj ketri i madh tokësor që hahet në disa pjesë të Kinës dhe vendit fqinj Mongoli, i cili ka shkaktuar historikisht shpërthime të murtajës në rajon.
Marmoti besohet të ketë shkaktuar epideminë e murtajës pneumonike të vitit 1911, e cila vrau rreth 63,000 njerëz në Kinën verilindore. Kjo kafshë gjuhej për leshin e saj. Produktet e leshit të sëmura tregtoheshin dhe transportoheshin në të gjithë vendin – duke infektuar mijëra gjatë rrugës.
Megjithëse kjo epidemi u arrit të vihej nën kontroll brenda një viti, infeksionet e murtajës të lidhura me marmot kanë vazhduar dekada më vonë. Vetëm javën e kaluar, dy raste të murtajës bubonike u konfirmuan në Mongoli – vëllezërit që kishin ngrënë të dy mish marmot, sipas agjencisë kineze të lajmeve Xinhua.
Majin e kaluar, një çift në Mongoli vdiq nga murtaja bubonike pasi hëngri veshkën e papjekur të një marmoti, që mendohet të ishte një ilaç popullor për shëndet të mirë. Edhe dy njerëz morën murtajë pneumonike – një formë tjetër e sëmundjes, e cila infekton mushkëritë në Mongolinë e Brendshme.
Pse është murtaja ende një problem?
Krijimi i antibiotikëve, të cilët mund të trajtojnë shumicën e infeksioneve nëse kapen mjaft herët, ka ndihmuar në mbajtjen nën kontroll të shpërthimeve të murtajës, duke parandaluar përhapjen e saj në të njëjtat përmasa sikurse në perjudhën e Mesjetës në Evropë.
Por edhe pse mjekësia moderne mund ta trajtojë murtajën si problem, ajo ende nuk e ka eleminuar atë plotësisht çka ka sjellë një rikthim të saj kohët e fundit. Kjo ka bërë që Organizata Botërore e Shëndetit (OBSH) ta kategorizojë atë si një sëmundje që nuk mund të eliminohet plotësisht, por rishfaqet herë pas here.
Rreth 1.000 deri në 2,000 persona arrijnë të infektohen nga murtaja çdo vit në botë, sipas OBSH. Por kjo shifër është një vlerësim modest, pasi nuk merr parasysh disa raste të raportuara.
Tri vendet më endemike – në të cilat murtaja ekziston gjithmonë – janë Republika Demokratike e Kongos, Madagaskari dhe Peru. Në Shtetet e Bashkuara, ka pasur një duzinë rastesh çdo vit, sipas Qendrave për Kontrollin dhe Parandalimin e Sëmundjeve. Në vitin 2015, dy njerëz në Kolorado vdiqën nga murtaja, dhe një vit më parë kishte tetë raste të raportuara në shtet.
Murtaja bubonike e patrajtuar mund të shndërrohet në murtajë pneumonike, e cila shkakton menjëherë pneumoni të një niveli më të avancuar, pasi bakteret përhapen në mushkëri.
Financuar Nga Bashkimi Europian
