Flash News

Kosova

Osmani reagon pas vrasjes së policit në veri: Sulme nga bandat kriminale serbe, aleatët të na mbështesin

Osmani reagon pas vrasjes së policit në veri: Sulme nga bandat

Presidentja e Kosovës, Vjosa Osmani ka reaguar pas ngjarjes së rëndë në Leposaviç në veri të Kosovës, ku mbet i vrarë një polic dhe u plagos një tjetër.

Në një postim në Facebook, Osmani shkruan se këto sulme janë të organizuara nga bandat kriminale serbe, ndaj rendit dhe ligjit të Kosovës.

Osmani thotë se sulme të tilla dëshmojnë aftësinë destabilizuese të Serbisë, teksa i bën thirrje aleatëve të reagojnë dhe mbështesin Kosovën.

“Vrasja e një polici dhe plagosja e një polici tjetër në veriun e Kosovës, e planifikuar, orkestruar dhe ekzekutuar nga bandat kriminale serbe, është sulm ndaj rendit dhe ligjit në veriun e vendit, është sulm ndaj Kosovës.

Këto sulme dëshmojnë edhe njëherë fuqinë destabilizuese të bandave kriminale, të organizuara nga Serbia, të cilat prej shumë kohësh, siç është dëshmuar edhe me sulmet ndaj pjesëtarëve të KFOR-it, gazetarëve e qytetarëve, po synojnë të destabilizojnë Kosovën dhe rajonin.

Sulmet e organizuara kundër forcave të rendit të Republikës së Kosovës janë sulme kundër sovranitetit të Republikës së Kosovës.

Përveç dënimit të ashpër të këtij agresioni të hapur të Serbisë ndaj Kosovës, pres që aleatët tanë do ta mbështesin Kosovën në përpjekjen e saj për vendosjen e rendit dhe ligjit si dhe ruajtjen e sovranitetit në çdo pjesë të Republikës së Kosovës.

Familjes së policit të vrarë ju shprehim ngushëllime të thella dhe i sigurojmë se autorët e këtyre akteve terroriste nuk do të mund t’i ikin drejtësisë.

Ftoj të gjithë qytetarët, institucionet dhe subjektet politike që të qëndrojnë të bashkuar në këtë kohë kur nga Serbia po sfidohet hapur integriteti territorial, siguria dhe sovraniteti i Republikës sonë.

Si Presidente e Republikës kam besimin e plotë në djemtë dhe vajzat tona nga Policia e Kosovës”, shkruan Osmani.

Të fundit