Kryeministri Edi Rama ka emëruar ish-ministrin e Jashtëm Ditmir Bushati si të dërguarin e tij të posaçëm në OSBE.
Lajmi u bë i ditur dje përmes faqes zyrtare të presidencës së OSBE-së, që Shqipëria e kryeson përgjatë gjithë 2020-ës, për herë të parë.
Me këtë post të ri, Bushati do të jetë personi që përcjell qëndrimet e Shqipërisë kur mungon kryesuesi Rama në çështje të caktuara.
Por, pse Rama zgjodhi Bushatin dhe jo ministri në detyrë i Punëve të Jashtme, Gent Cakaj?
Siç edhe është përfolur vazhdimisht, Bushati është ndër ‘të vetët’ që nuk i ka kursyer kritikat dhe mesazhet e forta nda partisë së tij. Përplasjet indirekte me Ramën u bënë hapur gjatë vitit që lamë pas, ndërsa krisja më e madhe mes tyre ishte shkarkimi i tij si drejtues politik i qarkut të Shkodrës dhe zëvendësimin me Valdrin Pjetrin.
Ky i fundit, pasi fitoi zgjedhjet e 30 qershorit pa garë, dha dorëheqjen pasi PD e denoncoi se ka gënjyer në formularin e dekriminalizimit, duke fshehur një dënim në të shkuarën në Itali.
Po ashtu, Bushati nuk nguroi të ngrejë zërin kundër edhe për ligjin anti-shpifje në fund të 2019-ës, duke dalë hapur kundër mazhorancës. Kujtojmë po ashtu se në Kuvend abstenoi në procesin e votimit.
Por, pavarësisht këtyre përplasjeve Bushati ishte personi që ka luajtur një rol me mjaft rëndësi në vendimin që Shqipëria të marrë kryesimin e OSBE.
Madje, ishte ai që dha këtë lajm, në dhjetor të 2018-ës, ndërsa pak ditë më vonë u shkarkua bashkë me 6 ministra të tjerë nga Rama dhe në vend të tij emëroi Gent Cakaj, një emër jo pak i kontestuar për këtë pozicion kyç.
Po ashtu, Bushati ka kryesuar misionin vëzhgues të OSBE-së në zgjedhjet parlamentare të Bjellorusisë, apo duke patur cilësinë e kreut të delegacionit parlamentar të OSBE-së, mori një ftesë në Washington nga Komisioni i Helsinkit të Kongresit Amerikan për të zhvilluar një seancë informuese mbi sfidat që e prisnin kryesinë shqiptare.
Një tjetër moment që vlen për t’u theksuar janë edhe kritikat e zyrtarit të lartë të SHBA, Robert Hand, Këshilltari i Komisionit Amerikan të Helsinkit.
Në një intervistë për Zërin e Amerikës, Hand insistonte se OSBE-ja ka nevojë për udhëheqje të fortë, ndërsa nuk fshehu rezervat për shkarkimin e Bushatit si ministër i Jashtëm.
“Kur dëgjuam për herë të parë që Shqipëria propozoi të kryesonte OSBE-në në vitin 2020, unë u tregova jashtëzakonisht mbështetës. Është një mundësi e mire për Shqipërinë që të mos jetë një importuese e sigurisë dhe stabilitetit nga jashtë, por të kontribuojë në fakt për sigurinë në të gjithë rajonin e OSBE-së. Dhe unë mendoj se ajo mund ta bënte këtë shumë mirë. Ajo ka një trup diplomatik shumë profesional, ministri i Jashtëm që po e mbështeste këtë ide, ishte kompetent, ai kishte shumë vite përvojë.
Por ishte shumë zhgënjyes fakti që brenda një muaji pasi OSBE-ja u pajtua me idenë, në ministrinë e jashtme pati ndryshime. Ju e dini: tani ka një pikëpyetje nëse kjo përvojë është ende aty për të arritur ta shtyjë përpara OSBE-në. Siç e përmenda më lart për shkak të agresionit rus në Ukrainë, por edhe të ndërhyrjeve diku tjetër në Evropë, situatën në Kaukaz, etj., OSBE-ja ka nevojë për udhëheqje të fortë, dhe unë vërtet shpresoj se Shqipëria do të jetë akoma në gjendje ta sigurojë atë udhëheqje, por sot jam pak më shumë i shqetësuar sesa isha vitin e kaluar kur u bë oferta e parë”, deklaroi zyrtari amerikan në atë kohë.
I dërguari i posaçëm është një risi e Presidencës Shqiptare të OSBE-së, pasi presidencat e shkuara nuk kanë pasur një pozicion të tillë.
Bushati do të trajtojë çështje dhe problematika të të gjitha fushave me të cilat kryesia mund të përballet gjatë drejtimit të organizatës.
Financuar Nga Bashkimi Europian
