Klikimet me dhimbje dhe lot nuk janë gazetari. A po shkel media çdo kufi etik?!

Publikimi i pamjeve të rënda nga aksidenti tragjik në Durrës, ku humbën jetën dy fëmijë, rikthen dhe njëherë rolin e etikës në media dhe kufijtë e raportimit të kronikës së zezë.

Ndërsa informacioni për ngjarjet kriminale apo aksidentet konsiderohet pjesë e së drejtës për informim, qytetarët dhe jo vetëm po kërkojnë rregulla më të forta për mënyrën se si këto ngjarje transmetohen në publik.

Në vende si Mbretëria e Bashkuar, mediat i nënshtrohen kodeve të forta etike që ndalojnë publikimin e pamjeve që cenojnë dinjitetin e viktimave, sidomos kur bëhet fjalë për të mitur.

 Raste të ngjashme trajtohen me kujdes të lartë, duke shmangur detajet tronditëse dhe ekspozimin e familjarëve.

Edhe në Shqipëri, kuadri ligjor parashikon mbrojtjen e privatësisë dhe dinjitetit njerëzor, por shpesh në praktikë mediat dhe rrjetet sociale publikojnë pamje të forta që ngjallin reagim publik.

Pas ngjarjes në Durrës, janë shtuar zërat që kërkojnë vendosjen e një “vije të kuqe” për publikimin e pamjeve të rënda, sidomos kur viktimat janë fëmijë, duke theksuar se informimi nuk duhet të kthehet në sensacionalizëm.

Deputetja e PD, Jorida Tabaku ka reaguar pas publikimit të pamjeve të aksidentit tragjik ku humbën jetën dy fëmijë në Durrës.

Në rrjetet sociale, ajo shkruan se është mizor transmetimi pa filtër i pamjeve të aksidentit që u mori jetën nga disa media dhe apelon se informimi është detyrim por dinjiteti njerëzor është kufiri që nuk duhet kaluar.

"Tragjedia në Durrës, me humbjen e dy jetëve të dy fëmijëve të pafajshëm, ka tronditur të gjithë. Një tragjedi që na lëndon të gjithlve.

Edhe më mizor është transmetimi pa filtër i pamjeve të aksidentit që u mori jetën. Dhimbja nuk mund të kthehet në spektakël.

I bëj thirrje Autoritetit të Mediave Audiovizive të marrë masa të menjëhershme për të ndaluar transmetimin e pamjeve të tilla dhe për të garantuar respektimin e etikës në informim.

Sepse informimi është detyrim por dinjiteti njerëzor është kufiri që nuk duhet kaluar.

Ngushëllime familjeve dhe Zoti pastë mëshirë dhe dashuri për to!", shkruan Tabaku

REAGIMET E POLITIKËS PËR NDRYSHIMIN E KODIT PENAL

Pas tragjedisë së rëndë në Durrës, ku humbën jetën dy fëmijë dhe një tjetër mbeti i plagosur, reagimet nga politika kanë qenë të forta, me thirrje të qarta për ndryshime në Kodin Penal.

Deputetja e Partisë Demokratike, Ina Zhupa, kërkon që drejtimi i mjetit në gjendje të dehur të mos trajtohet më si shkelje rrugore, por si krim i rëndë kundër jetës, duke theksuar se një veprim i tillë është i vetëdijshëm dhe me pasoja potencialisht fatale.

“Është koha që Kodi Penal të mos i trajtojë më këta persona si shkelës të rregullave të qarkullimit rrugor, por si autorë të krimeve të rënda kundër jetës.

 Kush drejton mjetin në gjendje të dehur, e bën me dijeni të plotë të pasojave. Drejtësia duhet të jetë në lartësinë e duhur dhe të japë drejtësi të vërtetë.”

Në të njëjtën linjë, edhe deputeti socialist Erion Braçe e cilëson ngjarjen si “vrasje me dashje” dhe jo aksident, duke i bërë thirrje Parlamentit të ndërhyjë menjëherë me masa më të ashpra ndëshkuese dhe politika konkrete për rritjen e sigurisë rrugore, ndërsa thekson se shumica parlamentare i ka votat për t’i miratuar këto ndryshime pa vonesë.

“Ndërkohë, kjo ngjarje më në fund të na shtyjë të mendojmë e veprojmë për urbanizim edhe më të thellë, përfshirë rrugë që e disfavorizojnë shpejtësinë në to, ndalime të shpejtësisë së makinave brenda lagjeve e jo vetëm tabela që një takëm i pështyjnë, mbylljen e rrugëve për t’u dhënë mundësi fëmijëve e të moshuarve të luajnë e të lëvizin, të pushojnë të sigurt, ndërtimin me çdo cmim të fushave e këndeve të sigurta për fëmijët e të moshuarit!

I kemi votat për t’i bërë këto; i kemi me shumicë! Ne nuk jemi thjesht për të ngushëlluar; jemi votuar për të vepruar! Duhet ta tregojmë tani”

RASTI MARTIN CANI

Një tjetër rast që ka ngjallur debat të fortë mbi etikën në media është ai i 14-vjeçarit Martin Cani, ku në rrjet dhe në disa media u publikua një video e ndjeshme që pretendohet se tregon momente para dhe pas ngjarjes tragjike të ndodhur në Tiranë në nëntor të vitit të kaluar.

Publikimi i këtyre pamjeve shkaktoi reagime të menjëhershme nga Autoriteti i Mediave Audiovizive, i cili e cilësoi shpërndarjen e tyre si shkelje të rëndë të etikës dhe ligjit, duke theksuar se ndjeshmëria e një ngjarjeje të tillë nuk duhet të përdoret për rritje shikueshmërie.

Sipas AMA-s, transmetimi i materialeve të tilla përbën abuzim sensacional dhe cenon dinjitetin e viktimës dhe familjarëve.

Autoriteti u ka bërë thirrje mediave që të ndalojnë menjëherë publikimin e këtyre pamjeve dhe të tregojnë përgjegjësi profesionale, duke respektuar Kodin e Transmetimit dhe parimet e gazetarisë etike.

Në qendër të qëndrimit të tyre është nevoja për të mbrojtur interesin më të lartë të fëmijës dhe ndjeshmërinë e opinionit publik ndaj një ngjarjeje që ka tronditur shoqërinë./ POLITIKO.AL