Dy Kuvende, dy statute/ Çfarë prodhoi 11 dhe 18 Dhjetori për demokratët

Ndryshe nga çdo dhjetor, që përkonte me kremtimin e themelimit të Partisë Demokratike në datën 11 të muajit, ky vit e ky dhjetor e gjeti selinë blu, të ndarë në dy kampe.

Nga njëra anë, ishte ish-kryeministri dhe ish-lideri i opozitës Sali Berisha, i cili mblodhi delegatët më 11 Dhjetor, dhe nga ana tjetër, kreu aktual i PD-së, Lulzim Basha, i cili me vendim edhe të Kryesisë së partisë, mblodhi sot Kuvendin e tij Kombëtar.

Kuvendi i 11 Dhjetorit

Në stadiumin ‘Air Albania’, Berisha mblodhi Kuvendin me 4935 delegatë të pranishëm, një shifër më e lartë se kuorumi i kërkuar për thirrjen e një kuvendi. Në nisje të punimeve u ngrit një komision që do të drejtonte punimet dhe do të bënte verifikimin e delegatëve të pranishëm.

Gjatë punimeve të Kuvendit, u hap edhe votimi për shkarkimin e Lulzim Bashës nga posti i kryetarit, vendim ky që u miratua me 4446 vota pro. Komisioni i Rithemelimit do të ketë në dorë drejtimin e Partisë Demokratike për një periudhë 6 mujore deri në zgjedhjen e kryetarit të ri më 22 mars.

Komisioni vendosi miratimin e statutit të ri dhe logos së re të partisë.

Ndërsa sot paralel me Kuvendine Bashës, u mbajt edhe referendumi në degët e PD-së në rrethe, për të zyrtarizuar shkarkimin e Lulzim Bashës.

Ndryshimet në statutin e PD në Kuvendin e Sali Berishës:

Ndryshime në Statut në 2018 dhe 2021 të bëra pas dy humbjeve të rënda nga kryetari në detyrë, jep dorëheqjen
Parimi 1 anëtar 1 votë me qëllim fuqizimin e anëtarësisë. Kjo për zgjedhjen e organeve në qendër dhe lokale.
Referendumi, vendimet e rëndësishme do merren nga anëtarësia ku i jep demokratëve referendumin që vendosin me demokraci të drejtpërdrejtë.
Për të garantuar dhe forcuar lirinë e fjalës dhe mendimit ,garantohen me parime dhe ne fusim në statut fraksionet.
Kryetari duhet të udhëheqë mbi bazën e vendimeve të tyre. Nuk i përdor dot si vulë noteri si me vendimet e fundit.
Duke riformatuar në madhësi organet për t’i bërë eficente, do bazohet në garën dhe zgjedhjen e anëtarëve me votë të fshehtë.
Rol përcaktues kuvendit dhe këshillit kombëtar. vendime te tyre përcaktojë politikëbërjen dhe aksionin politik.
Të zgjedhurit në organet qendrore do jenë shumicë.
Organizatat partnere përveç LGD dhe FRPD, është shtuar grupimi dhjetor 90. Ato do kenë akses më të sigurt në listat e kandidimit në pushtetin vendor.

18 Dhjetori i Lulzim Bashës

Kuvendi i Lulzim Bashës u zhvillua në tjetër ambient, në atë të Pallatit të Kongreseve. Tre ishin vendimet që Kuvendi miratoi sot: rezoluta për vendimet e 11 dhjetorit, të shpallurit ‘non-grata’ të papajtueshëm në funksionet e partisë, si edhe ngritja e një strukture të re të quajtur Aleanca Qytetare për demokracinë.

Në përfundim në Kuvendit, Lulzim Basha u shpreh në një deklaratë të shkurtër përmediet se nuk e njeh referendumin për shkarkimin e tij.

Ndryshimet e bëra në statutin e PD-së në Kuvendin e Lulzim Bashës:

1. Ratifikimi i rezolutës së Këshillit Kombëtar të PD të 12 dhjetor 2021
2. Me propozim të kryesisë së PD në mbledhjen e djeshme, pas një diskutimi dhe debati të gjërë brenda kryesisë, kryesia i propozon kuvendit kombëtar, që në funksion të së ardhmes të PD, të mbrojtjes së vlerave dhe të parimeve themelore të saj, për një Shqipëri si Evropa, marrëdhëniet me SHBA janë të paprekshme. Duke mbështetur vendimmarrjen e këshillit kombëtar, kryesisë, kryetarit të partisë, dhe duke parë të ardhmen e  vendit në udhëkryq dhe të ardhmen e PD të kërcënuar, nga jehona të së shkuarës frymë revanshiste që kërkon të shkatërrojë opozitën nga flukse me ide anti-demokratike, vendos:  a- shpallja non grata nga SHBA është e papajtueshme me çdo funksion drejtues në PD; b. Të mbështesë fuqimisht iniciativën për dekomunistizimin e vendimmarrjes dhe përfaqësimit publik në institucione shtetërore, publike dhe të partive.
3. Ndryshim në nenin 58 të statutit, për të shtuar një nen që ka të bëjë me krijimin si një strukturë statutore të aleancës qytetare për demokracisë.