McGonigal pranon fajin për dosjen shqiptare, pse është lajm i keq për qeverinë Rama

Departamenti i Drejtësisë në SHBA, Distrikti i Columbia ka njoftuar se ish-agjenti i FBI, Charles McGonigal ka pranuar fajësinë për fshehje të informacionit nga Byroja Federale e Hetimit.

Ai ka pranuar sot në Gjykatën e Uashingtonit se ka marrë 225 mijë dollarë nga Agron Nezaj, një ish agjent shqiptar dhe se ka takuar Edi Ramën.  

“McGonigal u deklarua fajtor sot për fshehjen e fakteve materiale për marrjen e 225,000 dollarëve nga një individ që kishte interesat e biznesit në Evropë, ndërsa McGonigal po mbikëqyrte përpjekjet e kundërzbulimit. Kërkesa u pranua nga gjyqtarja e Gjykatës së Qarkut të SHBA, Colleen Kollar-Kotelly, e cila caktoi seancën për dhënien e dënimit 16 shkurt 2024”, thuhet ndër të tjera në njoftim.

Por, çfarë do të thotë kjo për qeverinë shqiptare?

Duket se ky nuk është një lajm i mirë për qeverinë ‘Rama’, në një kohë kur qeveria po përballet me një sërë skandalesh të tjera.

Kujtojmë se në akt-padinë e SHBA-së, përmendet 14 herë edhe emri i kryeministrit Edi Rama dhe lidhjet që ai kishte, së bashku me dy zyrtarë të tjerë Shqiptarë, Agron Nezën dhe Dorian Duçkën, me ish-agjentin McGonigal.

Atje flitej për të paktën 4 takime që Rama kishte zhvilluar me McGonigal në Shqipëri dhe SHBA, të cilat ishin zhvilluar në kundërshtim me protokollet e FBI-së për të tilla takime.

Ish-agjenti special i FBI-së është akuzuar për pastrim parash, shkelje të sanksioneve të SHBA-së dhe vepra të tjera të lidhura me punën e tij me një oligark rus.

Dyshohet se McGonigal kreu disa shërbime në favor të tij, duke goditur një parti opozitare në Shqipëri, e cila dyshohet të jetë Partia Demokratike.

Opozita akuzon kryeministrin Rama se përdori McGonigal si “vrasës me pagesë” kundër Partisë Demokratike dhe pluralizmit në vend, madje ka kërkuar të ngrihet edhe një Komision Hetimor lidhur me këtë çështje.

"Bombat" e mediave të huaja

Për vizitat e McGonigal në Shqipëri “New York Times” ka shkruar më herët se “Ndërsa ishte ende në FBI, ai krijoi një marrëdhënie me kryeministrin e Shqipërisë Edi Rama dhe sipas prokurorëve të Uashingtonit ndërmori hapa që ishin në dobi të këtij politikani”.

Lidhjen mes parave që mori dhe shërbimit që i bëri Ramës e ka vënë në dukje edhe CNN, kur shkruajti “McGonigal dyshohet se pranoi të paktën 225,000 dollarë për të ofruar atë lloj ndihme, duke gënjyer FBI-në për aktivitetet e tij, duke përfshirë udhëtimet e shumta në Evropë të paguara nga kontakti i tij shqiptar dhe të marra pa informuar FBI-në, si dhe kamufloi një marrëdhënie të fshehtë që ai mbante me Kryeministrin e Shqipërisë”.

Akoma më i drejtpërdrejtë ishte Washington Post, kur përshkroi me nota më të errëta marrëdhënien mes Edi Ramës dhe ish zyrtarit të FBI-së. “Charles McGonigal, ka marrë para për të çuar përpara interesat e kryeministrit shqiptar“, shkruan gazeta. “McGonigal ishte i zhytur deri në fyt në marrëveshje sekrete me kryeministrin e Shqipërisë”,  thotë Washington Post.