Rënia e numrit të nxënësve dhe mbyllja e shkollave/ Ekspertja e arsimit për Politiko: Duhet rishikim i shpejtë dhe i koordinuar i politikave arsimore

Rreth 238 mijë nxënës nisën sot vitin e ri shkollor. 28 mijë nxënës u ulën për herë të parë në bankat e shkollës, por shifra e fëmijëve që ndjekin arsimin publik 9-vjeçar mbetet në rënie.

20 mijë fëmijë më pak se viti i kaluar u regjistruan për këtë vit shkollor. Shifrat janë tkurrur nga viti në vit, gjë që ka çuar në mbylljen e disa shkollave në vend.

Ekspertja e Arsimit Ana Llazo, në një intervistë për Politiko, renditi ndër faktorët që kanë ndikuar në rënien e numrit të nxënësve në shkollat e vendit, si emigracioni apo rënia e lindshmërisë.

"Rënia e numrit të nxënësve në shkolla është një çështje komplekse që përfshin disa faktorë,si socio-ekonomikë, demografikë dhe të politikave arsimore.

Shumë shqiptarë po zgjedhin të jetojnë jashtë duke çuar në një ulje të ndjeshme të popullsisë përfshirë edhe nxënësit.

Tendencat demografike tregojnë një rënie të ndjeshme të numrit të lindjeve vitet e fundit çka ndikon drejtpërdrejt në numrin e fëmijëve që përfshihen në sistemin arsimor", u shpreh Llazo për Politiko.

E pyetur se ku kanë çalur politikat e qeverisë, Llazo shprehet se mungesa në infrastrukturë dhe në zhvillimin profesional të mësuesve kanë ndikuar në motivimin e nxënësve dhe të prindërve për tu arsimuar.

"Politikat qeveritare në arsim edhe pse kanë pasur përmirësime në disa fusha mund të kenë çaluar në përpjekjet për tē përmirësuar cilësinë dhe tërheqjen e shkollave kryesisht në zonat rurale. Mungesa në infrastrukturë dhe në zhvillimin profesional të mësuesve mund të ketë ndikuar në motivimin e nxënësve dhe të prindërve për tu arsimuar", shtoi Ana Llazo.

Sa i përket mbylljes së shkollave në zonat rurale, Llazo thotë për Politiko se situata kërkon një reagim të shpejtë për rishikimin e politikave arsimore.

"Mbyllja e shkollave në zonat rurale është një këmbanë alarmi që tregon se nevoja për ndërhyrje të ndalimit të këtij fenomeni ēshtë e domosdoshme. Numri i ulët i nxënësve në këto zona lidhet ngushtë me emigracionin dhe urbanizimin duke shkaktuar boshllēk të popullsisë dhe më pak fëmijë që regjistrohen në shkolla. Ky fenomen mund të përhapet edhe në qytete më të vogla nëse nuk ndërmerren masa.

Nëse politikat qeveritare nuk adresojnë problemet themelore si pērmirësimin e kushteve të jetesës dhe krijimin e vendeve të punës në zonat rurale ekziston rreziku që ky fenomen mund të përhapet edhe nē qytetet e mesme apo të vogla. Rënia e numrit të nxënësve në qytete do të ndikonte negativisht në të gjithë sistemin arsimor duke çuar në mbyllje të shkollave edhe aty ku popullsia është e dendur. Në tërësi situata kërkon një reagim të shpejtë dhe të kordinuar duke përfshirë rishikimin e politikave arsimore, nxitjen e zhvillimit rural dhe përmirësimin e kushteve të përgjithshme të jetesës për të parandaluar përkeqësimin e metejshëm të situatës", u shpreh Llazo.

Përgatiti: Kristina Tepexhiku