Zbardhet dinamika e masakrës në Tiranë, si i vrau Dan Hutra tri gra në Paskuqan e Kamzë dhe plagosi 3 të tjera

Një ngjarje e rëndë ka tronditur sot Tiranën ku tri gra u vranë dhe tri të tjera u plagosën nga e njëjta dorë, në Paskuqan dhe Kamzë.

 “Rreth orës 12:30, në rrugën “Rustem Haklaj”, në Kodër-Kamzë, shtetasi Dan Hutra, rreth 40 vjeç, ka plagosur me armë zjarri shtetaset Elena Hysa, 35 vjeçe, dhe Kujtime Hysa, 60 vjeçe (ish-bashkëjetuesja  e tij dhe nëna e saj) dhe ka vrarë me armë zjarri shtetaset, Mevlute Hysa 30 vjeçe, (motra e ish-bashkëjetueses së tij) dhe Hasime Dafku 30 vjeçe, (e fejuara e vëllait të ish-bashkëjetueses)”, njoftoi policia pas krimit, ndërsa deri tani kanë dalë në pah detaje që kanë zbardhur dinamikën e ngjarjes tronditëse.

Si ndodhi masakra

Mësohet se Hutra ka hyrë në banesën ku ndodheshin familjarët e ish bashkëjetueses së tij, me të cilën kishte edhe një vajzë 4 muajshe dhe ka hapur zjarr.

Për pasojë ka mbetur e vdekur motra e ish gruas dhe të fejuarën e vëllait të saj, përkatësisht Mevlute Hysa 30 vjeçe dhe Hasime Dafku.

Burimet bëjnë me dije se gjatë aktit, autorit i është bllokuar kallashnikovi. Megjithatë, kjo nuk e ka penguar që të vijojë sulmin ndaj grave, pasi ka përdorur një thikë, me të cilën ka plagosur ish gruan dhe nënën e saj.

Pas kësaj masakre, ai ka shkuar në Kamzë, ku ka ekzekutuar në oborrin e shtëpisë ish të dashurën tjetër, 31-vjeçaren Etleva Kurti, motra e Vladimir Kurtit, i dënuar me burg përjetë për vrasjen e Agim Bucit. 

Pas krimit, ai është larguar me automjetin e tij tip ‘Benz c-class’.

Po ashtu, para se të vriste familjaret e ish-gruas, Dan Hutra plagosi fillimisht me thikë një 40-vjeçare, Marjana Gurakuqi në Astir.

Hutra kishte vetëm dy javë që ishte liruar nga burgu ku prej vitit 2021 ishte dënuar për dhunë në familje. Më parë në zonë e Astirit, Dan Hutra kishte plagosur me thikë edhe ish të dashurën tjetër, Marjana Gurakuqi. 

Skandali i drejtësisë

Dan Hutra përpos vrasjeve që kreu sot, kishte probleme me drejtësinë që në vitin 2003.

Në vitin 2003 ai kishte marrë peng kunatën dhe përdhunoi tjetrën. Katër vite më pas në 2007 Dan Hutra është dënuar pasi ka vrarë me armë zjarri ish-gruan Dafina Havalja, të cilën e kishte qëlluar me dy goditje thike në zemër dhe mëlçi.

“Po, une e kam vrarë gruan time, Dafinën, me thike. Jemi grindur dhe me pas e kam goditur, por gjithcka e kam bere pa vetedije”, ka deshmuar asokohe Dan Hutra, krim për të cilin u dënua, por në rrethana të dyshimta doli shumë shpejt nga burgu.

Në 2014 ka lënë qelinë ku vuante burgun në Drenovë, pra bëri vetëm 7 vite burg. Por problemet vazhduan.

Pasi nisi bashkëjetesën me partneren e dytë, Elena Hysa, Dan Hutra, autor i masakrës, ishte arrestuar në qershor të vitit 2021 për dhunë në familje, por ishte lënë i lirë më 16 shkurt 2023.

Tashmë pak ditë pasi doli nga qelia bëri kasaphanën e dytë.