Pse iu ka mërzitur kaq shumë fushata e Berishës?

Alfred Lela

Lexova sot të paktën tre editoriale që trajtonin fushatën e koalicionit PD-ASHM dhe zgjidhnin ta shihnin nga kënde krejt anësore. Asnjë përpjekje për të trajtuar thelbin. Në fakt futja në qendër e më të parëndësishmit element zbulon qëllimet e editorialistëve të e-gazetave tona.

Njëri syresh thoshte për shembull se fushatën e opozitës po e udhëheq Rama.

Në fakt është krejt e kundërta. Në PD e dinë se kush janë të huajt që bëjnë fushatën e Ramës, por a e e keni dëgjuar Berishën, apo ndonjë tjetër, të merret me ta?

Rama vetëm këtë bën. Merret gjithë ditën me Chris LaCivita-me gjasë duke bërë pikërisht atë që bëri me Trump-në fillim e pështyu pastaj e lëpiu.

Rama nuk e udhëheq fushatën e opozitës. Krejt e kundërta. Bëjini një analizë sasiore fjalimeve të Ramës dhe shihni se, në sa përqind merret ai me propozimet dhe sa me Berishën, apo elementë të tjerë të fushatës së PD-ASHM.

Në komunikim publik është e njohur aksioma se, kush krijon narrativën më të fortë mund të tërheqë në të edhe kundërshtarin. Tani, a e keni dëgjuar Berishën të ripërdorë ndonjë premtim të Ramës, riformulojë ndonjë qëndrim, ripërkufizojë ndonjë ofertë? Asnjë!

E kundërta po ndodh. Pasi i antemoi me radhë minimumin jetik, pensionet minimale, bonusin e fëmijës, Made in Albania, duke i konsideruar si falimente të vërteta të shtetit nëse bëheshin, kur pa se po ngjisnin, nën breshërinë e përsëritjes dhe seriozitetin e Berishës, ai i rimori dhe po i paraqet si origjinale.

Si u përgjigj kur u ngacmua për këtë? Premtimet nuk kanë të drejtë autori. Jo, nuk kanë, por, në gjuhën e Latifit ti do të quheshe kandidati ‘flip flop’. Pra, që kalon nga një degë në tjetrën. Që do të thotë nuk ke një aks apo kredo. I bie kryq fushës me mina të fushatës me tahma.

Berisha, jo vetëm po e udhëheq fushatën, por është i vetmi që po bën fushatë (ja një shpjegim këtu). Editorialistët, që shkruajnë atë që nuk besojnë, duhet ta dinë, me siguri, se çfarë konsiderohet fushatë. Shkenca e fushatës është, më së pari, përplasje e ideve dhe platformave për qeverisjen. Nëse Berisha e ka ofruar të vetën, duke e bazuar te pesë kolonat e: Paketës së Dinjitetit, Made in Albania (apo ekonomia sovrane e patriotike), pastrimi i shtëpisë (dmth lufta me zero tolerancë kundër krim-korrupsionit); lehtësimi i barrës së taksave; dhe Shqipëria qendër e TIK, cila është platforma apo idetë e Ramës për zhvillimin e vendit? Bufi; këneta; mos dilni të votoni; u kam marrë tre të rinj të FRPD; do t’ju marr edhe Ilir Vrenozin; po nuk më votuat mua jeni autikë; (a u kujtohet kandidati në Këlcyrë që u uronte tumor atyre që nuk e votonin?)!!!

Ah, po, pasaporta europiane! Shqiptarët duan të ikin, nuk duan të udhëtojnë. Dhe pse duan të ikin? Sepse në 12 vite Rama nuk ka bërë për ta një Shqipëri që të mos i detyrojë të ikin.

Pretendimi tjetër se është Rama që po bën fushatë si të Trump, dhe Berisha si Harris, është në vetvete naiv, por edhe një huqje spektakolare shënjestre. Trump fitoi, jo se ishte transgresiv si qenie politike, por sepse ofroi një pakete ekonomike agresive. Edhe të majtët më radikalë amerikanë e thonë këtë: Trump na mundi me ekonomi. Sali Berisha është duke bërë të njëjtën gjë.

Çfarë ka trumpiane te Rama? Vetëm një gjë: kënetën. Let’s dry the swamp! bërtiste Trump, i ndjekur nga mbështetësit e tij. Këneta, këneta, ta thajmë kënetën! thotë edhe Rama çdo ditë, gjithë ditën.

Por ka një ndryshim të madh. Nëse Trump mund ta thoshte dhe ta bënte tharjen e kënetës, Rama nuk e ka këtë mundësi. Ai ka qenë në pushtet 12 vjet.

Eshtë vetë këneta.