Rasti “Tik tok”: Kush humb çelësat e shtëpisë, kërkon të kyçë gjithçka

Alfred Lela

Mbyllja e një platforme të komunikimit masiv me pretekstin se rrezikon jetën e nxënësve është një masë qeveritare absurde, që e kërkon zgjidhjen aty ku nuk është. Vendimi i shpallur nga kryeministri Rama, me gjasë pas vrasjes së 14 vjeçarit Martin Cani nga një bashkëmoshatar, jo vetëm që nuk adreson thelbin e problemit, por hap një të ri. Krijon një sistem censure që me masa ndëshkimore dhe ndalimore kërkon të rregullojë arealin e komunikimit masiv, duke cënuar një prej lirive themelore të njeriut, shprehjes.

Nëse rasti Cani do të kishte qenë vërtetë shtysa e kësaj mase ndëshkimore autoritare z. Rama ka disa alternativa para se të shkojë te ndalimi total i platformës Tik tok.

Së pari, mund të ndalojë përdorimin e të gjitha rrjeteve sociale në sistemin shkollor elementar dhe të mesëm në vend.

Së dyti, ashtu si Australia, mund të ndalojë përdorimin e Tik tok, te Facebook apo Instagram për shetasit nën 16 vjeç.

Secila nga këto masa do të ishte më e përshtatshme dhe do të adresonte problemin nga i cili lindi shtysa për ndalimin e Tik tok, pra do u hiqte nxënësve të shkollave një ‘armë të ftohtë’ konflikti verbal dhe vizual, që më vonë mund të kthehej në fizik.

Fakti se Rama nuk ka zgjedhur ndalimin e pjesshëm, por të përgjithshëm, e bën masën të bjerë era politikë dhe përllogaritje elektorale.

Për disa arsye.

Së pari, Tik tok është platforma me algoritmin më demokratik ndër rrjetet ekzistuese sociale. Kjo mundëson një shtrirje më të gjerë dhe më intensive të materilait të postuar aty dhe, rrjedhimisht, shikueshmëri dhe ndikim më të madh.

Së dyti, ndryshe nga Facebook, një platfromë e cila ka dëshmuar një vullnet të qartë për të bashkëpunuar me qeveritë e ndryshme, përfshirë edhe shqiptaren, Tik tok deri më tash ka qenë më e hapur, më pak e ndikuar dhe më rezistente ndaj vendosje së algoritmeve kontrolluese.

Duke qenë e tillë Tik tok ka prodhuar një efekt të tretë duke u bërë shpejt një platformë e preferuar e shpërndarjes së imazhit dhe mesazhit.

Për sa i intereson kontekstit shqiptar, me Ramën në të, Tik tok është shndërruar në një platformë të shpërhapjes së mesazhit kritik me qeverinë. Në një vit elektoral një mjet i tillë i pakontrolluar i komunikimit masiv, nuk parapëlqehet nëpër këmbë. Kështuqë, Rama përdori pretekstin e vrasjes së një 14 vjeçari për të instaluar një masë jodemokratike dhe censuruese ndaj kritikëve apo kundërshtarëve politikë.

Nuk është hera e parë që Kryeministri bën përçapje të tilla. Për disa vite rresht ai pat ngulmuar për një projektligj të ashtuquajtur të shpifjes, i cili në thelb nuk ishte gjë tjetër veçse përpjekja për të kufizuar apo bllokuar mediat e reja-portalet- të cilat nuk i kontrollonte dot.

Beteja e Tik tok është vetëm një përpjekje për të kufizuar platformat e komunikimit apo mediat e pakontolluara prej tij.

Pretendimi i Ramës është jo vetëm hipokrit, por edhe grotesk. Të fajësosh Tik tok për gjithë sherrin që çoi në përplasjen fizike dhe vrasjen me thikë nga një adolshent të një vërsniku është si të thuash se ke parë në radio një film. Tik tok nuk është platformë e shkëmbimit me tekst, domimanca e tij është te videot apo imazhet dhe shpërndarja e tyre, pra nuk është platformë e tekstit si Faceboook apo e shkëmbimeve të mesazheve si ëhatsapp apo snapchat. Do të thotë Tik tok nuk ka qenë platforma ku adolshentët janë grinder, gjë që konfirmohet edhe nga vetë kompania, e cila përgënjeshtoi kryeministrin Rama, duke thënë se nxënësit në fjalë nuk ishin aktivë në Tik tok.

Duke ditur këtë, Ramës i mbetet në dorë përpjekja autoritare dhe e pandershme për të kufizuar komunikimin e kritikëve dhe kundërshtarit politik.