Mazhoranca e drejtuar nga kryeministri Edi Rama ka propozuar një akt të paprecedent në Kuvend, që i jep këtij institucioni kompetenca që nuk i ka patur më parë dhe që i japin rolin e një Gjykate, çka bie ndesh me ndarjen e pushteteve në një sistem demokratik.
‘Panorama’ ka zbardhur propozimin e Partisë Socialiste për ndryshimin e rregullores, specifikisht nenin 118 të saj që jep “autorizimin për procedimin” e deputetëve dhe të ministrave. Sipas këtij propozimi të ri, Prokurori duhet të paraqesë prova te kryetari i Kuvendit për procedimin apo arrestimin e deputetit, çka i jep Kuvendit kompetencat e një Gjykate, pasi vetëm në Gjykatë prokurori mund të paraqesë prova dhe t’i argumentojë ato.
“Kërkesa për të autorizuar caktimin e masës së sigurimit të arrestit në burg ose në shtëpi, heqjes së lirisë në çfarëdolloj forme, kontrollit personal ose të banesës, i paraqitet kryetarit të Kuvendit nga Prokurori. Kërkesa përmban një relacion të arsyetuar dhe të shoqëruar me provat që mbështesin kërkesën”, thuhet në nenin e rregullores së propozuar nga mazhoranca.
Ndërsa rregullorja aktuale në fuqi është shumë e thjeshtë. Prokurori dorëzon kërkesën në Kuvend për arrestimin e një deputeti. Këshilli për Mandatet dhe Imunitetin njofton deputetin për të cilin kërkohet arrestimi. Dhe këtij të fundit i lind e drejta të paraqitet dhe të japë përgjigje për akuzat që ngrihen ndaj tij. “Deputeti ka të drejtë të paraqesë në Këshill, me shkrim ose me gojë, shpjegimet dhe vërejtjet e tij rreth çështjes”, thuhet në rregulloren në fuqi. Më pas, Këshilli i Rregullores merr vendimin me shumicë votash, duke ia kaluar propozimin deputetëve për votim.
Në fakt, propozimi i ri i PS bazohet në precedentin e deputetit socialist, Saimir Tahiri, ku si asnjëherë më parë Kuvendi u bë mburojë për arrestimin e tij dhe vonoi për më shumë se një javë kërkesën për kontrollin e banesës, çka shtoi dyshimet se ish-ministrit të Brendshëm i ishte lënë e gjithë koha në dispozicion për prishjen e provave.
Pas këtij veprimi të mazhorancës ka reaguar kreu i opozitës shqiptare, Lulzim Basha, i cili ka shprehur hapur kundërshtimin ndaj propozimit të PS, që sipas tij, zhbën reformën në drejtësi dhe mbron politikanët e korruptuar nga drejtësia.
Basha lëshoi edhe një mesazh direkt për ambasadorin e SHBA-së në Tiranë, Donald Lu, i cili ishte i pari që kërkoi arrestimin e “peshqve të mëdhenj”.
“Edi Rama ka propozuar një ligj të posaçëm, ky është një ligj i posaçëm, i prezantuar gjoja si ndryshim i rregullores, për të mbrojtur ‘peshqit e mëdhenj’. Të gjithë ata që prisnin arrestimin dhe vënien para drejtësisë së ‘peshqve të mëdhenj’, tani duhet të kënaqen me cironka”, u shpreh Basha jashtë ambienteve të selisë blu.
Financuar Nga Bashkimi Europian
