Zgjedhjet e 14 majit, OSBE: Rama përdori ministrat për fushatë dhe kërcënoi kandidatët e opozitës

OSBE-ODIHR ka publikuar raportin për zgjedhjet lokale të 14 majit të këtij viti.

OSBE thekson se ka raste të abuzimit me burimet shtetërore, dhe se "fusha e lojës" nuk ishte e barabartë pasi partia në pushtet angazhoi të gjithë ministrat në fushatë.

"Përveç zotit Rama, në fushatën e PS-së morën pjesë dukshëm të gjithë ministrat e qeverisë përveç njërit, të cilët gjithashtu nuk ishin kandidatë, me një ministër të ndryshëm për çdo qark të vendit.

Shpesh, nuk bëhej dallim i qartë ndërmjet aktiviteteve të tyre zyrtare dhe atyre të fushatës. Disa bashkëbisedues të MVZ të ODIHR shprehu shqetësimin se KQZ-ja nuk reagoi menjëherë ndaj aktiviteteve të tilla, gjë që e përforcoi më tej avantazhin e PS-së gjatë fushatës.", thuhet në raport.

Gjithashtu raporti nxjerr në pah bonusin prej 5,000 lekësh për pensionistët, dhe rritjen e pagave për punonjësit shtetëror, si një lëvizje manipuluese përpara zgjedhjeve.

OSBE përmend edhe kërcënimet e herëpashershme që kryeministri Rama bënte gjatë fushatës për zgjedhësit duke ju kujtuar se "thesin" e kishte ai në dorë dhe se nuk do të kishte bashkëpunim me kryebashkiakët opozitarë.

“Një mesazh kam unë. E kam shumë të thjeshtë dhe shumë të qartë. Me kandidatët e zorrës qorre që largqoftë dikush, diku, i çon në zyrën e bashkisë nuk ka bashkëpunim. Nuk ka. Nuk ka se si të ketë. Nuk ka sesi të ketë sepse arsyeja pse ata janë vendosur këtu, atje, atje…

Nuk është për ta bërë më të mirë Elbasanin apo për të bërë më të mirë Tropojën apo për të bërë më të mirë ku di unë se kë, por është për të marrë pengje dhe për të thënë që “ne dy kokat e zorrës qorre jemi shumë të rëndësishëm. Apendicitu ju vdes ndaj trajtojeni mirë apendicitin ju amerikanë se ne përndryshe e ngordhim fare këtë vend”  shprehej Rama në fushatë.

"Përveç vendimit të 31 marsit për të dhënë një bonus prej 5,000 lekësh (rreth 44 euro) për pensionistët, qeveria mori mbi dhjetë vendime në prill për të rritur pagat e kategorive të ndryshme të punonjësve publikë, si mësuesit apo zjarrfikësit. Përveç kësaj, Z. Rama në disa raste kushtëzoi mbështetjen e ardhshme të qeverisë për bashkitë me rezultatet e zgjedhjeve. Më 2 maj, DPRC i bëri thirrje Prokurorisë së Posaçme Kundër Krimit të Organizuar (SPAK) duke i konsideruar ato deklarata si kërcënim dhe duke kërkuar hetim penal për deklarata të tilla të bëra nga Zoti Rama gjatë gjithë fushatës." , shkruan OSBE.

 

 

Dokumenta bashkëngjitur