Si ndryshoi qëndrim Edi Rama me veprime flagrante kur mësoi se një prej pronarëve të familjes Begeja ishte edhe Malltezi

Mbrëmjen e të shtunës që lamë pas në media u shpërnda informacioni për arrestimin e Jamarbër Malltezit.

Kreu i Departamentit të Mjedisit në PD, njëherësh dhëndri i Sali Berishës dyshohet nga SPAK për “korrupsion aktiv” dhe “pastrim parash”, në vijim të procedurave të privatizimit të kompleksit sportiv, ku ai është një prej trashëgimtarëve ligjorë, si edhe shndërrimin e truallit në zonë rezidenciale banimi.

Debati për ish-kompleksin sportiv “Partizani” i ndërtuar në truallin që sistemi komunist ua sekuestroi 5 familjeve të vjetra tiranase: Begeja, Alimehmeti, Vaqarri, Llagami dhe Saliaga është i njohur për opinionin publik.

Kjo edhe për faktin se vetë Malltezi disa muaj më parë paditi në SPAK për shpifje ministrin e Brendshëm, Taulant Balla.

Në kallëzimin e tij, vetë Malltezi sqaron ‘fije për pe’ se si qëndron e vërteta e këtij debati. Sipas Malltezit, Edi Rama, ish kryebashkiak i Tiranës ka ndryshuar menjëherë qëndrim kur miratoi në 2008 lejet ndërtimore për zhvillimin e sipërfaqeve në pronësi të familjes Begeja, kur mori vesh se një nga pronarët ishte edhe Malltezi.

“ Edi Rama, në cilësinë e kryetarit të Bashkisë Tiranë dhe të KRT të kësaj Bashkie, miratoi në vitin 2007 dhe 2008 lejet ndërtimore për zhvillimin e sipërfaqeve në pronësi të familjes Begeja. Bashkia e Tiranës e drejtuar prej tij, kish qenë pjesë e procesit të privatizimit të klubit shumësportësh dhe atij të futbollit dhe në momentin e lëshimit të lejes së ndërtimit. Bashkia Tiranë nuk ka shprehur kurrë rezerva në lidhje me këtë proces.  Ne kete periudhe Edi Rama mbeshteti konceptin e zhvillimit urban te zones duke qenë se per projektin, sipas rekomandimit të Edi Ramës, do te angazohej nje nga emrat me te medhenj te urbanistikes dhe arkitektures boterore, Daniel Libeskind.

Edi Rama ndryshoi qendrimin katerciperisht pas lëshimit të lejes në vitin 2008, pasi mori dijeni se një ndër bashkë-investitorët e projektit ishte Jamarbër Malltezi, trashëgimtar i familjes pronare Begeja. Për shkak të lidhjes së tij familjare me kryeministrin Berisha, Edi Rama, në abuzim flagrant të detyrës zyrtare dhe shkeljes së ligjit fillon një seri veprimesh abuzive dhe politikisht të motivuara, që synonin pengimin e ndërtimit dhe zhvillimin e pronës.

Pavarësisht se e kish miratuar vete lejen e ndërtimit, me anë të dy vendimeve, pa dhënë asnjë arsye dhe pa marrë asnjë vendim revokimi për këto leje, ai refuzoi të zbardhë dhe t’u japë pronarëve dhe firmës ndërtuese vendimin për lejen e ndërtimit, të miratuar nga KRT, e drejtuar prej tij.

Duke qenë se kjo shkaktoi dëm material të konsiderueshëm dhe ishte një veprim abuziv, një prej bashkëinvestitorëve dhe firma ndërtuese iu drejtuan gjykatës duke i kërkuar të detyrojë Bashkine Tirane të zbardhë vendimin e dhënies së lejes se ndertimit”, thuhet në kallëzimin e Malltezit.

“Abuzimi me detyrën dhe refuzimi për të zbardhur lejen e ndërtimit, pa dhënë asnjë shkak ligjor, por thjesht për hakmarrje politike dhe sepse mundej, është tipar dallues i pushtetit korruptues dhe abuziv të Edi Ramës dhe vetëm një prej akteve të serisë së veprimeve të tij ndaj kundërshtarëve politikë. Kjo ishte tregues i qarte qe bashkeinvestitoret ishin kthyer në tabelë qitjeje per inatet politike te Edi Rames. Ndaj edhe ne te ardhmen pronaret private perdoren hapesirat qe u mundesonte ligji per te mbrojtur projektin e tyre nga sulmet e kundraligjshme te Edi Rames”, deklaron ndër të tjera Malltezi.