Dorëheqjet e para, si zhgënjyen pas zgjedhjeve Erion Braçe dhe Najada Çomo

Dje, kryeministri Edi Rama lajmëroi largimin e Najada Çomos, shefes së Infektivit nga Kuvendi ende pa nisur zyrtarisht.

Ndërsa ishte e pozicionuar e dyta në listën e qarkut të Tiranës në zgjedhjet e 25 prillit dhe e prezantuar me shumë bujë nga vetë Rama, ky i fundit tha në mbledhjen e fundit me ministrat e mandatit të dytë se Çomo i kishte dorëzuar mandatin e deputetes, sipas tij për shkak të situatës së përkeqësuar të pandemisë, nga prania e variantit Delta.

Kandidimi i mjekes së njohur në kulmin e pandemisë u komentua shumë, madje u interpretua si lëvizje për të siguruar më shumë mbështetje në zgjedhjet e 25 prillit.

Kjo në fakt u faktua edhe me rezultatin e votave preferenciale që mjekja arriti të grumbullojë. në fakt, ajo siguroi mandatin, por jo mbështetjen e shqiptarëve, pasi sipas të dhënave zyrtare nga KQZ, Çomo mori vetëm1583 vota.

Zv.kryeministri Erion Braçe po ashtu komunikoi largimin nga posti i zv.kryeministrit. Në 25 prill, atij iu besua edhe detyra e drejtuesit politik për qarkun e Fierit, që në fakt rezultoi zhgënjim për PS sa i takon objektivave të përcaktuara.

Vetëm pak ditë pas 25 prillit, zv. Kryeministri, Braçe në një reagim në rrjetet sociale mori përgjegjësinë për mosarritjen e objektivit për Qarkun e Fierit. Në këtë qark, ndryshe nga zgjedhjet e vitit 2017, PS arriti të merrte 9 mandate nga 10 që kishte.

Në reagimin e tij, Braçe nën cilësinë e drejtuesit politik, ndonëse theksonte se në Bashkinë Divjakë socialistët kanë arritur fitore dhe votat e saj përbëjnë vetëm 10% të Qarkut Fier, sërish tha se përgjegjësia është e tij.

“Ne nuk i arritëm objektivat që kishim në raport me qëllimin e shpallur në vota e mandate! Numri i jashtëzakonshëm i fletëve të votimit shpallur të pavlefshme – 13.56% në Bashkinë Divjakë, ndikoi në rezultat gjithashtu. Kjo është përgjegjësia ime. Politike, organizative, morale gjithashtu. Ndaj me takon mua t’i kërkoj ndjesë publike drejtuesit politik të PS në Qarkun Fier, Gramoz Ruçit, çdo socialisti që bëri më shumë se në e priti më shumë nga ne”, shprehej zv.kryeministri.

Braçe në reagimin e tij theksonte se po lexojnë me vëmendje “çdo deformim kriminal që iu bë vlerësimit të punës prej punës, në një xhiro dhunë, kërcënimi, frikësimi, shitje e blerje për votën”.

Nga ana tjetër, ai fliste edhe për ata që sipas tij kanë dashur “të fitojnë duke grabitur pronën publike e private” duke thënë se janë kundërshtarët e tij.

Zv.kryeministri shprehej se në mandatin e ardhshëm duhet të punohet më shumë për njerëzit e zakonshëm dhe bujqit pasi “një grusht tregtarësh i grabisin e dhunojnë çdo ditë, ashpër, pa respekt për mundin e djersën e tyre dhe veç me një qellim-fitimin personal.”

Kështu, largimi i Çomos dhe Braçes një ditë më parë lidhet me gjasë edhe me rezultatet e dobëta që i sollën PS pas zgjedhjeve të 4 muajve më parë.