Çfarë dihet deri tani për listën ‘Aktiv1sti’ me 266 faqe. Opozita akuza për manipulim të administratës, PS e mohon

Aplikacioni Aktiv1sti i krijuar për të promovimin e punës së socialistëve përmes ripostimeve, pëlqimeve dhe komenteve ka ngjallur debate dhe reagime prej ditësh.

Përplasjet janë përshkallëzuar që prej mbrëmjes së 7 shkurtit kur në media u shpërnda një listë e punonjësve të institucioneve të shtetit shqiptar, me 266 faqe përfshirë edhe njerëz të drejtësisë, policë, mjekë, arsimtarë etj.

Çfarë është aplikacioni “Aktiv1sti”

Aplikacioni “Aktiv1sti” u prezantua nga Partia Socialiste në prill të vitit të shkuar. Në atë kohë, u njoftua se pjesë e atij aplikacioni mund të bëhej çdo person e jo vetëm anëtarët e Partisë Socialiste.

Në lidhje me këtë aplikacion, opozita ka hedhur akuza ndaj Partisë socialiste dhe ka kërkuar hetim nga SPAK. Sekretarja për Marrëdhëniet me Publikun në PD, Jola Hysaj, u shpreh me 6 Shkurt, se punonjësit publike janë urdhëruar që të shkarkojnë aplikacionin dhe të pëlqejnë apo shpërndajnë postimet e ministrave të qeverisë.

Reagimet nga PS dhe opozita

Kreu i Partisë së Lirisë, Ilir Meta, i kërkoi drejtësisë të hetojë si krim zgjedhor përdorimin e aplikacionit “Aktivisti” nga Partia Socialiste.

Sipas tij, administratës po i bëhet presion që të shkarkojë dhe të përdorë këtë aplikacion, përmes të cilit i bëhet jehonë aktiviteteve të Qeverisë dhe institucioneve të drejtuara nga mazhoranca.

Në të njëjtën linjë ka qenë edhe zëdhënësja e Partisë Demokratike Floriana Garo. Në një deklatatë për mediat, Garo tha se pjesë e listës së personave që kanë shkarkuar aplikacionin ‘Aktivisti’ të PS-së janë edhe emra të njohur që nga ish prokurorja e Përgjithshme, Ina Rama e deri te Alfred Balla, anëtar i KLP.

Garo shtoi se në këtë rast opozita nuk ka kujt t’i drejtohet për hetim për shkak se vetë prokurorët dhe gjyqtarët janë pjesë e këtij aplikacioni.

Zëvendëskryeministrja Belinda Balluku mohoi këto akuza duke e cilësuar si një aplikacion transparent që mund të aksesohet nga të gjithë përdoruesit e smartfonëve.

Në daljen e saj për mediat pas mbarimit të mbledhjes së qeverisë, ajo u pyet nga gazetarët në lidhje me platformën “Aktivisti”, ku theksoi se ajo nuk është gjë tjetër veçse një aplikacion si gjithë të tjerët, por më e përqendruar.

Edhe kryeministri Edi Rama ka reaguar pas publikimit të mekanizmit. Ai shkroi se PS do të ndjekë në rrugë ligjore nxjerrjen dhe manipulimin e të dhënave ndërsa shton se çdo përpjekje për të hedhur baltë mbi PS i rrit socialistëve dëshirën për të ecur të sigurt drejt fitores me datë 14 Maj.

“Partia Socialiste do të ndjekë në rrugë ligjore nxjerrjen, manipulimin dhe fabrikimin e të dhënave të rrjetit social të aktivistëve të saj, i cili është lehtësisht i verifikueshëm si një mekanizëm komunikimi i brendshëm mbi bazën e vullnetarizmit të çdo përdoruesi.

Çdo përpjekje e dëshpëruar propagandistike për të hedhur edhe më shumë baltë mbi PS thjesht na rrit dëshirën dhe na forcon vullnetin tonë në rrugën e një fitoreje tjetër kuptimplotë, më 14 maj, kur falë edhe rrjetit tonë social të aktivistëve Partia Socialiste do të jetë shumë hapa përpara kundërshtarëve të çoroditur e të dëshpëruar”, shkruan Rama.

Kreu i Grupit Parlamentar të PS-së u pyet nga gazetarët edhe nëse partia në të cilën ai bën pjesë po i ushtron presion administratës përmes aplikacionit “Aktivisti.”

Balla sqaroi se njëlloj si patronazhistët, ky aplikacion është një tjetër tipar që tregon se PS-ja është një parti e mirorganizuar sidomos kur vjen momenti për fushata elektorale. Balla përmendi praktika të ngjashme të ndjekura në SHBA.

“Nëse do t’ju jepet mundësia të shkoni dhe të ndiqni organizimin e një fushate zgjedhore të Partisë Demokratike amerikane apo të Partisë Kristian-Demokrate në Gjermani, do të kuptoni që është e njëjta gjë. Obama në 2012 deklaronte se fushata tradicionale, me mënyrën tradicionale mbaroi në 2012”, tha Balla.

Edhe zëvedësministri Etjen Xhafaj hedh poshtë akuzat e opozitës që qeveria e majtë po I bën presion administratës për like, share dhe komente. Madje socialisti vë në “bast” edhe mandatin e tij për këtë akuzë.

“Nuk i bëjmë presion, sepse ne nuk e dimë ku punon. Nëse më nxirrini një rast që është hequr nga puna unë lë mandatin”, tha Xhafaj.