Opozita protestë brenda dhe jashtë sallës për skandalin ‘McGonigal’, PS zbut tonet. Ç’ndodhi sot në Kuvend

Edhe këtë të enjte, seanca plenare në Kuvend u shoqërua me mjaft debate mes opozitës dhe mazhorancës, ndërsa jashtë saj u mbajt një tjertër protestë e thirrur nga opozita.

Përjashtimi i 8 deputetëve të PD,  përfshirë edhe kryetarin Sali Berisha, shkaktoi tension në oborrin e parlamentit, pasi garda nuk i lejoi të hynin në sallë, pas vendimit të sekretariatit të etikës javën e shkuar.

Ata iu bashkuan protestës përballë Kuvendit.

I ndodhur mes protestuesve, kreu i Partisë Demokratike Sali Berisha tha se mazhoranca po shkel të drejtën kushtetuese të deputetëve dhe po pengon ngritjen e komisioneve hetimore.

Berisha paralajmëroi Kryeministrin Edi Rama dhe kreun e grupit parlamentar të PS-së Taulant Balla se do të mbajnë përgjegjësi personale për vendimin që pritet të marrë Gjykata me 3 Mars për lidershipin e Partisë Demokratike.

Demokratët e mbetur në sallë këmbëngulën për ndryshimin e rendit të ditës, duke kërkuar që kryefjalë të ishte skandali McGonigal, por socialistët e rrëzuan me shumicë vote kërkesën e tyre.

Po ashtu, ata bllokuan përsëri foltoren duke kërkuar ngritjen e një komisioni hetimor për çështjen McGonigal.

 Edhe socialistët kishin gati një hap pas. Komisioni hetimor që refuzohej deri në miratimin e ligjit të ri, këtë herë u trajtua si një kërkesë ende e hapur. 

Nga ana tjetër, kreu i PD, Berisha tha se nëse vendimi i Gjykatës (në 3 mars) nuk do të ishte i drejtë, ai dhe qytetarët do të futeshin në Kuvend për 3 minuta. Me deklaratën e tij, Berisha sfidoi kreun e grupit parlamentar të PS-së, Taulant Balla, i cili tha se pas 3 marsit (dita e gjyqit) PD do të jetë ndryshe.

Ndërkohë me datë 2 Mars është parashikuar të zhvillohet për 23 orë e 20 minuta mocioni me debat për çështjen “McGonigal”, ku dhe Kryeministri Edi Rama ka konfirmuar se do të jetë i pranishëm.