"Shëndetësia falas", koha kur jeta trajtohet si lojë dhe spitalet si stadiume pa stola dhe fushë

Përgatiti: Neta Fero

Çfarë po ndodh me mjekësinë në vend?! Në vetëm 3 ditë, janë publikuar raste të cilat kanë shokuar publikun. 2 foshnja dhe një fëmijë 3-vjeçar kanë humbur jetën, dikush në spital dhe dikush në shtratin e tij për shkak të dozës së narkozës 'që do i lehtësonte" dhimbjen e dhëmbëve.

Të tilla raste vënë në diskutim profesionalizimin e mjekësisë në vendin tonë, duke na stepur për t'ju drejtuar bluzëve të bardha.

 Dhe në vorbullën e emocioneve, padyshim që çdokush prej nesh bën fajtorë mjekët. Por a janë 'bluzat e bardha" fajtorët kryesor?

Ka pasur plotë raste që mjekët janë quajtur heronj, të cilët kanë shpëtuar shumë jetë, duke treguar aftësi dhe profesionalizëm të admirueshëm. Por çfarë mund të bëjë një mjek, kur për X sëmundje nuk ka aparaturat e duhura, ilaçet e duhura, dhomat dhe shtretërit e nevojshëm?!

A duhet drejtuar gishti vetëm nga ata?!

"Tenderë mjekësie, kaq shpenzime (x shumë) për të bërë këtë gjë për shëndetësinë, mjekësi falas", janë togfjalëshat që veshët tanë janë rrahur më së shumti.

Por pavarësisht se prej vitesh është premtuar “shëndetësi falas”, sot jo vetëm që nuk ka asnjë shërbim falas por shqiptarët janë detyruar të vuajnë qoftë edhe për të kryer një vizitë të thjeshtë mjekësore në poliklinikën e lagjes.

Mungesa e kushteve të tilla në shërbimet e shëndetësisë në vendin tonë, na ka bërë që të përballemi me këtë panoramë. Dhe lind pyetja; A mbaruan 'lojërat' e tjera, që të vinte radha për të luajtur me jetën?

 

RASTE

Frymëmarrja e foshnjës që ndali pas 9 ditësh jetë

Gazetarja Klodiana Lala ka rrëfyer historinë e trishtë të një foshnjeje 9 ditëshe që humbi jetën në QSUT.

Gazetarja shkruan se kjo është një histori që tregon edhe se si mjekët ngrenë duart lart dhe i përcjellin familjarët plot halle të gjejnë zgjidhje në spitalet jashtë vendit.

“Është një histori se si “shëndetësia falas” është thjesht një “realitet” që e besojnë veç qeveritarët, por jo qytetarët që duhet të përballen me mungesë të shumëçkaje, përfshi edhe pamundësinë e sqarimi për atë që duhet të bëjnë”, shkruan gazetarja.

Ajo ka treguar rastin e një personi që njeh i cili kishte treguar se djali vetëm 9 ditësh, lindi mirë, i shëndetshëm.

“Mjekët na thanë që kishte një problem ne zemër”, tregon ai. “Ndërhyrja duhej të bëhej sa më urgjent. Cdo sekondë që kalonte mund të rezultonte fatale për jetën e djalit. Mjeku më tha që në spitalin tonë nuk kemi mundësi të bëjmë këtë lloj ndërhyrje për shkak se nuk disponojmë as sallë operimi për fëmijë, as mjekë specialistë dhe as ilaçet e nevojshme për ta trajtuar këtë rast”, rrëfen më tej ai.

“Duhet ta gjeja ilacin që mungonte në spital. Bëhej fjalë për ilacin Alprostoglandinë. Edhe mjekët e maternitetit më thanë që nuk e kishin këtë ilac. Mund të gjendej vetëm të spitali Amerikan. E kërkova gjithandej nëpër farmaci dhe në fund shkova të Amerikan 3. Ilaci kushtonte 20.700 lekë një ampulë. Unë kisha vetëm 300 mijë lekë të vjetra. Mora vetëm një flakon dhe ika, ti zgjasja dhe disa orë jetë djalit. Më duhet të gjeja lekët e tjera”,. Për shkak të mungesës së ndërhyrjes koronare dhe mostrajtimit me ilace, djali filloj të nxihej në fytyrë.", shkruan gazetarja teksa tregon rrëfimin e Afrimit, të atin e foshnjes.

Kallëzimi në prokurori

“Unë kallëzuesi dërgova bashkëshorten time Obstetrik Gjinekologjik “Mbretëresha Geraldinë për lindje të planifikuar me operacion më datë 13 gusht 2023. Në orën 11.35 fëmija lindi. Lindja shkoi shumë mirë dhe fëmija lindi me poshtë 3950 kg. Rreth orës 20:00 u konstatua se fëmija ka probleme me oksigjenimin. Fëmijën e dërguan në ambjentet e reanimacionit ku iu vënë ekzaminime të mëtejshme”.

“Unë dhe bashkëshortja ime, kemi pothuajse 30 vite që paguajmë kontributet për sigurimet shoqërore e shëndetësore. Kemi dhënë gjithë këto vite contribute në buxhetin e shtetit, që kur te kishim nevojë siç patëm në këtë rast shteti shqiptar nëpërmjet shërbimit shëndetësor të na ofronte shërbimin e duhur mjekësor dhe jo ta linin djalin tonë të vdiste me argumentin se nuk kemi mjetet e duhura për ta trajtuar. Djali jonë u diagnostikua me problemin shëndetësor, transpozicion të enëve të mëdha të zemrës, e cila nuk ishte sëmundje e pashërueshme, por problemi shëndetësor kërkonte trajtim urgjent”, thuhet në padi.

Vdes fëmija 8-muajsh në Tiranë/ 6 TETOR 2023

Një fëmijë 8 muajsh ka humbur jetë rreth dy javë më parë në një spital në Tiranën, teksa prindërit kanë bërë kallëzim në prokurorinë e Shkodrës për neglizhencë.

Sipas burimeve, foshnja 8 muajshe nga fshati Grudë e Shkodrës ndërroi jetë në spital në Tiranë, ku ishte shtruar pas një problemi me zemrën. Foshnja duhej t’i nënshtrohej një transplanti, por nuk ka mundur të mbijetojë.

Prindërit e foshnjës e kanë kallëzuar rastin në Prokurorinë e Shkodrës ku kanë pretenduar se shkak për vdekjen e të miturit ka qenë neglizhenca dhe paaftësia në mjekim nga mjekët e Spitalit të Shkodrës.

Ngjarja mësohet se ka ndodhur rreth dy javë më parë, kur i mituri është dërguar në spitalin e Shkodrës dhe më është dërguar në Tiranë. Në spitalin e fëmijëve në Tiranë, foshnja është intubuar, por nuk ia ka dalë.

Do mjekonte dhëmbët, narkoza i merr jetën 3-vjeçarit

Një fëmijë 3-vjeçar ndërroi jetë më 5 Tetor 2023, pasi kishte shkuar tek stomatologu për të mjekuar dhëmbët. Ngjarja ka ndodhur tre ditë më parë.

Pas vizitës tek dentisti, vogëlushi ka qëndruar për disa ditë në gjendje kome dhe në momentin që është dërguar në spital, prindërit pretendojnë se mjekët u kanë thënë se i është helmuar mëlçia nga narkoza dhe ka ndërruar jetë.

Prindërit e Brianit kanë kallëzuar penalisht dentistin Roland Xhaxho dhe të bijën Ina Xhaxho për pakujdesi në shërbim.

“Specialistët për Hetimin e Krimeve të Komisariatit të Policisë Nr. 4 kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Tiranë, për shtetasin R. Xh., 70 vjeç, banues në Tiranë, për veprën penale “Mjekimi i pakujdesshëm”, pasi ka bërë kallëzim shtetasi B. S. se shtetasi R. Xh. ka mjekuar në mënyrë të pakujdesshme në klinikën e tij private, djalin 3-vjeçar të shtetasit B. S., i cili pas mjekimit në këtë klinikë ka shfaqur komplikacione dhe pas 3 ditësh, ka humbur jetën, në spital.” – njofton Policia.

Skandal te Trauma/ Mjekët i kërkuan 5 mijë euro për operacion, 35-vjeçarit i zë krimba plaga

Pas një aksidenti më 13/07/2023, 35 vjeçari Eduart u shtrua në spitalin Ushtarak (Spitali i Traumës) dhe është lënë pa mjekim një javë deri sa plaga ka zënë krimba.

Sipas 35-vjeçarit, ai është lënë qëllimisht pa mjekuar nga doktorët, të cilët i kanë kërkuar 5.000 euro për të kryer operacionin në këmbë.

“Isha në gjendje koma për 36 ditë. Më mbajtën në sallë deri sa zuri këmba krima. Pasi u bëra operim me datë 25 më nxorrën nga spitali. Në spital nuk kishte kondicioner, doktorët vinin te shikonin si je si shkon, lekët të xhepi dhe iknin. Nuk më panë deri sa këmba zuri krimba. Kater dite pas operimit me përzunë nga spitali, duke me thene se kam imunitet te forte dhe nuk kam nevoje për spital. Nuk kam mundësi në shtëpi që ti bej shërbim vetes sime, kur une nuk mund te lëviz fare”- u shpreh Eduarti.

Pyetja shtrohet si ka mundësi që të ndodhin gjera të tilla skandaloze në spitale shtetërore ?

Si ka mundësi që mjekët lënë pa mjekuar pacientin për një javë të tërë duke ditur se personi ka bërë aksident automobilistik?

Denoncime

“O paguaj, o vdis, motoja e Rilindjes për mjekësinë falas!”

Tender pas tenderi, lek pas leku, dhe asnjë ndryshim në një prej qendrat më të mëdha spitalore shtetërore në vendin tonë.

Deputeti i Partisë Demokratike, Tritan Shehu më 20/01/2023  ka denoncuar gjendjen në të cilën ndodhet QSUT-ja, ku ka mungesë të PTCA Stent në qendrën publike të kardiologjisë.

Nëpërmjet një postimi në FB, Shehu ka shkruar se pacientët shqiptarë janë të detyruar të shkojnë te privati me pagesa në dorë, pasi motoja e “Rilindjes” për shëndetësi “falas” nuk vlen.

“Mungojnë edhe PTCA Stent-et ne qendrën kryesore publike te kardiologjisë te QSUT. Te shqipëruara, përdoren për arteriet coronare koronare te zemrës! Ne shumicën dërmuese te rasteve këtu behet fjale për urgjencën ekstreme ose sub urgjencën kardiake.

Pra pacientet detyrohen te shkojnë te privati me pagese ne dore ose… “O paguaj, o vdis”- motoja e Rilindjes kjo për shëndetësinë “falas”! Para pak javësh ngrita te njëjtën gjë për oksigjentorët, pra per kardiokirurgjinë.

E njëjta histori për protezat ortopedike kirurgjikale, jo rrallë për lentet okulistike e kështu me radhe!Pra pacientet detyrohen qëllimshëm te shkojnë te privati…. duke paguar…ndryshe… Pasojë e qëllimshme kjo nga një sistem shendetesor i shkatërruar prej një qeverisje te pa përgjegjshme!”, ka shkruar Shehu.

Dështon shëndetësia “falas e Rilindjes”,  mjekët çojnë pacientët në spitalet private

Pavarësisht se “Rilindja” e Edi Ramës ka ardhur në pushtet duke premtuar “shëndetësi falas”, sot pas 10 vitesh qeverisje jo vetëm që nuk ka asnjë shërbim falas por shqiptarët janë detyruar të vuajnë qoftë edhe për të kryer një vizitë të thjeshtë mjekësore në poliklinikën e lagjes.

Mjekët e qendrës spitalore universitare, thuajse çdo ditë orientojnë pacientët e tyre në dyert e spitaleve private për të bërë analizat.

Një zonjë nga Mati tregoi për mikrofonin e “Euroneës Albania” se analizat në privat i kanë kushtuar rreth 40 mijë lekë. Sipas saj mjekët i kanë thënë se në shtet nuk ofrohen ato analiza dhe për këtë arsye i është drejtuar spitaleve private.

Referuar këtij rasti, më datë 21 SHKURT të këtij viti, deputetja demokrate Albana Vokshi i ka drejtuar një sërë pyetjes Ministres së Shëndetësisë (asokohe) Ogerta Manastirliu për të cilën tha se ka shpenzuar miliona nga buxheti i shtetit por sërish qytetarët orientohen që të shkojnë dhe të kryejnë vizita mjekësore në spitalet private.

 “Pyetje për Ministren e Shëndetësisë Ogerta Manastirliu

1. Pse pacientët me insult cerebral, edhe kur kjo ndodh brenda QSUT, transferohen në spitale private?

2. Ku kanë shkuar paratë e taksave të shqiptarëve kur aparaturat e domosdome për shpëtimin e jetës nuk funksionojnë?

3. Pse trombektomia bëhet vetëm në privat?

4. Pse nuk bëhet trombektomia në shtet ?

5. Sa kushton tromboektomia në një spital privat? A është kjo arësyeja që nuk bëhet në shtet?

Këto pyetje do ja kërkoj edhe zyrtarisht Ministres. Edhe nëse do të refuzojë përsëri të përgjigjet, herët a vonë dë të përgjigjet para drejtësisë!! Dështim shëndetësia falas”, shkruan Vokshi.

Edhe më e vështirë është situate për pacientët që vuajnë nga kanceri. Edhe pse medikamentet për kimioterapi gjenden në spital, fatura e ilaçeve pas çdo seance dhe ecejaket nga rrethet drejt Tiranës i bëjnë të papërballueshme kostot.

Problemit të orientimit drejt privatit, i shtohet edhe qëndrimi për orë në radhë, në pritje të konsultës me mjekun. Edhe pse janë me fasha orare të përcaktuara shpesh ndodh që të ketë vonesa.

Dëliri i "mjekësisë falas"

"Mund të flitet për “mbulim universal”, “chek-up falas”, por  jo për mjekësi falas", kështu është shprehur para disa vitesh ish-ministre e Shëndetësisë, Anila Godo, teksa u pyet se sa larg realitetit janë konceptet “mbulim universal”, “testim”, “chek-up falas”.

"Mund të flitet për “mbulim universal”, “chek-up falas”, por  jo për mjekësi falas. Kjo më duket lojë fjalësh aq më shumë në një ekonomi ku buxheti për shëndetësinë përbën 3% të GDP-së. Rëndësi ka të menaxhosh mirë këtë buxhet të pamjaftueshëm, ta bësh sa më të efektshëm; paraja për shëndetësinë, të qarkullojë pa humbje të pajustifikuara e sa më shumë të jetë e mundur, 1 plus 1 të bëjnë 2.

Me standardet që ofron sot shkenca mjekësore e me pretendimin e drejtë që ka çdokush për jetëgjatësinë e cilësinë e jetës, është e pamundur të “mbulosh” çdo gjë ose  në të kundërt do cenosh cilësinë dhe standardin e shërbimit të ofruar, por ne duhet të synojmë njëkohësisht gjerësinë e thellësinë."

Padi ndaj mjekut?!

Juristja Gjyljana Bakalli është shprehur se ka pasur mjaft raste kur prindërit kanë hedhur në gjyq spitalet, pasi mjekët nuk u kanë dhënë informacione të sakta gjatë shtatzënisë.

E ftuar në një emisioni juristja tha se ka pasur raste kur për shkak të mos lajmërimit nga mjeku, prindërit kanë sjellë në jetë fëmijë me deformime.

 “Ka pasur raste jo vetëm në spitale shtetërore, por edhe private që nuk e kanë dhënë të saktë informacionin gjatë shtatzënisë dhe ka pasur raste kur fëmijët kanë dalë me deformime dhe prindërit nuk e kanë ditur.

Spitalet janë paditur në Gjykatën Civile dhe kanë fituar. Këtu flasim për shifra goxha të larta që janë fituar nëpër gjyqe. Ndoshta te 100.000 euro”.