Pas skandalit ‘Mcgonigal’, Ramës ‘i kthejnë’ shpinën zyrtarët amerikanë. Kthehet vetëm me foto nga oborri i OKB-së

Shqipëria këtë vit drejtoi seancën e Këshillit të Sigurimit të Organizatës së Kombeve të Bashkuara. Seanca u mbajt tri ditë më parë, ndërsa para nisjes ka qenë vetë kryeministri Edi Rama ai i cili postoi një foto nga oborri i OKB-së.

Por, ndryshe nga viti i shkuar ku Shqipëria nisi mandatin e saj dy vjeçar si anëtare e Këshillit të Sigurimit, në profilet e rrjeteve sociale të kryeministrit nuk pati mburrje me “Foto dite’, teksa pozonte krah zyrtarëve të lartë amerikanë.

Nëse kthehemi një vit pas, kujtojmë se Rama së bashku me të shoqen Linda, u takuan me presidentin e SHBA-së, Joe Biden dhe bashkëshorten e tij Zonjën e Parë, Jill Biden.

Fotografinë e postoi vetë kryeministri në Facebook, ku krahas fotos shkroi: Fotoja e ditës.

Në 15 shkurt të vitit të shkuar, kryeministri u takua edhe me sekretarin amerikan të Shtetit Antony Blinken në Uashington, pak javë pasi Shqipëria kishte nisur mandatin e saj dy vjeçar si anëtare e Këshillit të Sigurimit.

Ndërkohë, një ditë më parë ishte takuar dhe pozuar në Neë York  edhe me Sekretarin e Përgjithshëm të OKB, António Guterres.

Pak muaj më vonë Rama zhvillon po ashtu edhe një takim me ambasadoren e SHBA-së në OKB, Linda Thomas Greenfield.

“New York, Kombet e Bashkuara – Me Linda Thomas Greenfield, Ambasadorja e SHBA-së në OKB, e cila shprehu konsideratat më të larta për performancën e Shqipërisë në Këshillin e Sigurimit”, shkruante Rama.

Ndërkohë, këtë vit, edhe pse Rama drejtoi mbledhjen e Këshillit të Sigurimit në emër të Shqipërisë dhe kishte në tavolinë sekretarin Blinken, ky i fundit u pa duke lënë sallën pa asnjë shtrëngim duarsh me liderin shqiptar dhe duke u kthyer vetëm me një foto mendueshëm nga oborri i OKB-së. 

Arsyet e kësaj ‘braktisjeje’ duket se kanë një emërues të përbashkët, skandali ‘McGonigal’, ku ish agjenti i FBI dje pranoi fajësinë se kishte marrë 225,000 dollarë nga shqiptaro-amerikani, Agron Nezaj, i cili sipas dokumenteve në gjykatë, u bë informatori për hetimin e FBI-së lidhur me kontaktet dhe takimet e tij në Shqipëri.

Në këmbim të pranimit të një dënimi më të lehtë, ish agjenti ka pranuar të gjithë akuzat që i bëhen në dosjen shqiptare, duke fundosur kështu kryeministrin shqiptar, teksa përmendet 11 herë në dosje. Kosto këto që si duket sapo kanë nisur...