“Ndjesë, por mbeta në trafik”, po për ambulancat a ka ndonjë justifikim?!

Përgatiti: Neta Fero

Është kthyer një gjë e zakonshme trafiku i pafund në Tiranë, i cili nis që në orët e para të mëngjesit dhe përfundon në mbrëmje, diku afër orës 23:00.

Gjithsecili prej nesh niset rreth 2 orë para për të shkuar në punë apo shkollë dhe nëse vonohemi justifikohemi me “Ndjesë, por mbeta në trafik”.

Po për ambulancat a ka ndonjë justifikim?

A ka ndonjë justifikim pse nuk arritën në kohë në vendngjarje, ose pse nuk mbërritën në kohë në spital?

Dhe ato korsi emergjence që ishin tek rruga  “Dritan Hoxha” dhe ajo e Durrësit, kanë dalë jashtë funksionit, kalojnë Taxit dhe biçikletat. Nuk është për habi, jetojmë në Shqipëri.

Pas kaq shumë kohësh, pas investimit me shifra marramendëse për infrastrukturën, nuk shikojmë asnjë përmirësim përpos reagimit qytetar të drejtuesve të mjeteve, të cilët përpiqen të krijojnë kanale të lira mesa munden, që ambulanca të "çajë" trafikun.

Politiko.al ka siguruar disa momente ku ambulancat bllokohen në trafik dhe ajo që dëgjohet fortë është sirena e cila “çan ajrin”, por e ka të pamundur të çajë rrugën.

Sikurse shikohet në video, ambulanca ka mbetur e bllokuar tek “Fabrika e miellit”, e cila është një ndër zonat që bëhet çdo ditë kaos me trafik. Ambulanca mbeti në trafik rreth 20 minuta.

Pavarësisht alarmit të sirenave që dëgjohen më shumë se dy kilometra larg, trafiku i rënduar bën që ambulancat të mos lëvizin nga vendi, pasi shoferët e makinave e kanë të pamundur të devijojnë.

Kjo situatë është alarmante dhe mund të çojë në përkeqësim të gjendjes shëndetësore të qytetarit që kërkon ndihmën e parë.

Një tjetër panoramë na vjen afër zonës së Brrylit, ku ambulanca pavarësisht se kishte ndezur sirenat, drejtuesit e mjeteve e kishin të pamundur të devijonin për të hapur rrugën.

Në rrugë të Elbasanit, misioni i ambulancës është akoma më i vështirë. Mungesa e korsisë së dedikuar dhe radhët e gjata të mjeteve, bëjnë që ajo të ngec shpesh-herë në trafik.

Po ajo pyetje që rrjedhimisht të krijohet është, këta projektuesit apo kryetari i bashkisë, a kanë familjarë që sëmuren dhe ngecin në trafik? Së ndoshta kështu mund të bëjnë diçka.

Ajo që bën habi është fati se Bashkia realizon tendera për monitorimin e trafikut. Një tender i bërë edhe vitin e kaluar, por që në vitin 2023 i është dyfishuar vlera.

Objekti i procedurës së prokurimit është “ofrimi i shërbimit online për monitorimin e trafikut urban në Bashkinë e Tiranës”. Fondi limit i kësaj procedure është 41.666.667 lekë, ose mbi 400 mijë euro. Procedura do të bëhet në muajin shtator, teksa bëhet fjalë për rrjet internet dhe rrjet intranet.

Shtatori është drejt fundit, trafiku po rritet, njerëzit mbeten në pikëpyetje për jetën.

"Guximtarë" ose sosje durimi, shoferët ndjekin ambulancat

Nuk janë të pakta rastet ku qytetarët, disave që u është sosur durimi e disa që ndoshta bëjnë dhe “garipin”, ndjekin ambulancën për t’i shpëtuar trafikut.

Por fatmirësisht bashkia “i ka sytë shqiponjë” për ti gjobitur, kurse për të parë vështirësitë që hasin ambulancat për qarkullim, pamja turbullohet.

Raste

1. Ndiqte ambulancën që ishte në shërbim emergjence, për t’i shpëtuar trafikut, shoferit në Tiranë i hiqet patenta për një vit dhe vihet nën hetim (24.03.23)

Një person është vënë nën hetim nga policia rrugore e Tiranës pasi me qëllim për të dalë nga trafiku i shkaktuar nga një aksident në rrugën interurbane Durrës-Tiranë, ndiqte ambulancën e cila ishte në shërbim emergjence.

Shoferi u gjobit me 30 mijë lekë të reja si dhe heqjen e patentës për një vit.

Policia Rrugore e Tiranës apelon që drejtuesit e mjeteve të tregojnë kujdes në raport me rregullat e qarkullimit rrugor dhe veçanërisht për të mos ndjekur nga afër dhe shfrytëzuar progresionin e lëvizjes së mjeteve të emergjencave, me sisteme zanore dhe pamore ndezur.

2.Ndiqte ambulancën për t’i shpëtuar trafikut, e pëson shoferi në Tiranë (14,07. 2023)

Një drejtues automjeti është gjobitur nga policia dhe është vënë nën hetim në gjendje të lirë pasi është konstatuar duke ndjekur një ambulancë.

Sipas policisë ai ndiqte ambulancën për t’i shpëtuar trafikut. Ndaj tij është vendosur një gjobë prej 40 mijë lekësh të rinj.

Njoftimi i policisë

Ndiqte ambulancën e cila ishte në shërbim emergjence, procedohet me masë administrative dhe pezullim të lejes së drejtimit, drejtuesi i automjetit.

Policia Rrugore e Tiranës në vijim të kontrolleve të ushtruara për rritjen e parametrave të sigurisë rrugore, në rrugën interurbane Durrës-Tiranë, ka konstatuar dhe ndaluar një automjet që ndiqte ambulancën e cila ishte në shërbim emergjence.

Ndaj drejtuesit të automjetit u vendos masa administrative 40000 lekë të rinj.

Policia Rrugore e Tiranës apelon që drejtuesit e mjeteve të tregojnë kujdes në raport me rregullat e qarkullimit rrugor dhe veçanërisht për të mos ndjekur nga afër dhe shfrytëzuar progresionin e lëvizjes së mjeteve të emergjencave, me sisteme zanore dhe pamore ndezur.

Nuk dihet sa do zgjasë kjo situatë, pamja mbetet e zymtë, aq më tepër tani në dimër që sapo të fillojnë reshjet vargu i makinave të mbetura në trafik s’ka fund.