Nga “astma” në urbane, tek “stresi” në trafik, Politiko.al sjell panoramën e 'Tiranës moderne'

Nga Neta Fero

Prej vitesh i njëjti problem! Nëse keni punë, mësim apo ndonjë takim/angazhim në orën 08:00 në mëngjes, bëni mirë të niseni nga shtëpia 2 orë para, për të arritur në kohë.

Fundja jetojmë në Tiranë, në vendin me popullsinë më të madhe në Shqipëri, si dhe në vendin që janë grumbulluar më shumë tenderë gjasme për monitorimin e trafikut dhe efikasitetin e çdo qytetari. Dhe pse asnjë prej këtyre nuk po hasim.

Trafiku në Tiranë vijon të jetë një problematikë e theksuar, ku qytetarëve u duhen me orë të tëra jo vetëm për të hyrë në kryeqytet, por edhe për të lëvizur brenda tij duke shkaktuar kaos, zhurmë dhe bori pafund nga humbja e durimit duke qëndruar me orë të tera në rrugë.

Sidomos në ato që njihen si oraret e pikut, orët e para të mëngjesit dhe ora 17:00 e pasdites.

Zonat më problematike janë ato në hyrje të qytetit, si në zonën e ish Doganës apo edhe në aksin e Saukut ku radha e mjeteve në pritje për të lëvizur është e gjatë.

Po ashtu dhe kthesa e Astirit, Lapraka, zona e Trenit dhe ish fusha e Aviacionit janë ata që kanë fluksin më të lartë, ku mjetet mbeten të bllokuara.

Le të mos flasim për zonën tek “Fabrika e Miellit”, aty po që vlen shprehja “Zoti iu shtoftë durimin’.

Por ka dhe nga ata “shoferët e zotë”, që bëjnë disa manovra dhe i bien rrugës për shkurt, duke kaluar bordurat të cilat janë vendosur për të mos kaluar në rrugën tjetër.

“Lekët e çuara dëm”

Mirë qytetarët, por Bashkia s’ka asnjë plan për të rregulluar këtë fenomen. A në fakt po, po realizojnë tendera për monitorimin e trafikut.

Një tender i bërë edhe vitin e kaluar, por që në vitin 2023 i është dyfishuar vlera. Para pak ditësh, Bashkia e Tiranës ka lajmëruar Agjencinë e Prokurimit Publik se ka në plan të bëjë një tender për të monitoruar trafikun në kryeqytet.

Objekti i procedurës së prokurimit është “ofrimi i shërbimit online për monitorimin e trafikut urban në Bashkinë e Tiranës”. Fondi limit i kësaj procedure është 41.666.667 lekë, ose mbi 400 mijë euro. Procedura do të bëhet në muajin shtator, teksa bëhet fjalë për rrjet internet dhe rrjet intranet.

Mirëpo i njëjti tender është bërë nga kryebashkiaku Veliaj edhe një vit më parë. Objekti është i njëjtë “ofrimi i shërbimit online për monitorimin e trafikut”. Në vitin 2022 tender kishte një vlerë sa gjysma e këtij aktuali, pra 200 mijë euro. Fitues është shpallur kompania “ALBTELECOM” me një vlerë 18.676.960 lekë.

Por, pavarësisht se për dy vite janë hedhur mbi 600 mijë euro, a do të rregullohet trafiku në kryeqytet?  Pamjet flasin vetë, po ashtu dhe infrastruktura rrugore që çdo ditë po ngushtohet nga pallatet e shumta që po ndërtohen.

Parkimi

Parkimi është një nga faktorët e tjerë që e shtojnë trafikun në Tiranë. Një qytetar në kërkim të një parkingu e shton trafikun në qytet.

Tirana ka nevojë për një plan qarkullimi, nisur nga çfarë është gjendja ekzistuese, çfarë është propozuar deri tani nga studime të ndryshme që janë bërë dhe cilat janë problemet e parashikuara në të ardhmen përveç atyre aktuale.

Transporti urban

Stacionet e autobusëve mbushen plot, për shkak të vonesave të mjeteve të transportit publik.

“Kam ardhur në orën 07:05, ora po shkon 08:10 dhe autobusi ende s’ka ardhur”, shprehet një qytetar i cili fillon punën në orën 08:00 dhe për shkak të trafikut ai mori rrugën në këmbë.

 E për shkak të vonesave brenda urbaneve ka dyndje.

“Çmenduri, po shtrydhemi me njëri-tjetrin.”, “Shtyhuni dhe pak”, “Prit të hyjë dhe unë”, “Ohh më vajti vonë”, janë disa nga fjalitë që të hasin më shumë veshët në stacionet e urbanëve.

Por a do ishte kjo situatë ndryshe, nëse ne do kishim një korsi të dedikuar urbanëve?

Le të shpresojmë se mos do bëhet më mirë...dhe nëse jo, lë të bëjmë diçka të gjithë së bashku.