Valë krimesh në Shqipëri, tre të vrarë e 4 të plagosur në 48 orët e fundit

Shqipëria është tronditur nga ngjarje të rënda kriminale në 48 orët e fundit.

Dy ditet e fundit në media janë raportuar disa ngjarje kriminale, në sajë të cilave kanë mbetur të vdekur tre persona dhe janë plagosur 4 të tjerë.

Mëngjesin e djeshëm (26 shtator) u raportua për vrasjen e Martin Bardhit dhe u plagosjen e tre personave të tjerë në Rrëshen.

Bardhi ndodhej në lokalin e tij në qendër të Rrëshenit, në prani edhe të disa miqve dhe të afërmve, kur dy persona të maskuar, kanë zbritur nga një automjet tip Jeep dhe kanë lëshuar breshëri të shtënash.

Martin Bardhi ose Marku, është person i njohur për autoritetet, teksa në muajin mars të këtij viti bashkë me djalin dhe nipin e tij u përfshinë në një konflikt me armë zjarri në dalje të qytetit të Rrëshenit.

59-vjeçari u arrestua dhe sipas informacioneve kishte fituar lirinë në rrethana ende të paqarta disa kohë më parë, teksa në kërkim ishte djali dhe nipi i tij.

Në komisariatin e Lezhës janë shoqëruar disa anëtarë nga fisi Reçi, mes tyre edhe Saimir Reçi i cili pati dhe konfliktin në mars të këtij viti.

Ndërkohë, personi që shihni në foto është 38-vjeçari Fatjon Dervishi i cili u vra në mesnatën e mbrëmshme në Sukth të Durrësit.

Autorët kanë qëlluar mbi mjetin e Dervishit me 15 plumba. Në momentin e ngjarjes, viktima ka qenë i shoqëruar nga një mik.

Viktima është nipi i Rexhep Kepit ose i njohur si “Arapi” i Sukthit, Dervishi është vëllai i Ferdinand Dervishi alias Fatbardh Doda.

Dervishi akuzohet në Shqipëri se në 3 janar të një viti më parë, plagosi me armë në një hotel në autostradën Tiranë-Durrës 23 vjeçaren E. Koroveshi e prej atëherë rezulton person i shpallur në kërkim.

Dervishi u akuzua nga Liza Malshi, nëna e të zhdukuri në vitin 2018 në Spanjë Tauland Malshi, se kishte gisht në zhdukjen e këtij të fundit.

Sakaq, mbrëmjen e sotme një tjetër krim shënohet në Veri të vendit. Babë e bir ishin shënjestra e një atenati në Dukagjin të Shkodrës. 

Për pasojë, plumbat i morën jetën Zef Gurit, ndërsa i biri Gjin Guri mbeti i plagosur.