Flash News

Kur nderi ‘vret’ më shumë se dhuna, Lediona Braho për Politiko: Incesti, një problem i heshtur në shoqërinë shqiptare

Vijon zjarri në inceneratorin e Elbasanit, tymi toksik rrezikon shëndetin e qytetarëve

SHBA feston 249-vjetorin e Pavarësisë

Pas ultimatumit të Ramës, japin dorëheqjen të gjithë drejtorët e bashkisë së Vlorës

Posta e mëngjesit/ Me 2 rreshta: Çfarë pati rëndësi dje në Shqipëri

OP-ED

Një profil i Qeverisë ‘Rama 3’ dhe roli i opozitës në të

Politiko 26 Gusht 2021, 20:41
Një profil i Qeverisë ‘Rama 3’ dhe roli i opozitës

Alfred Lela

Kryeministri i ka dhënë disa sinjale, në fjalën e mbajtur së fundi në prani të ministrave të vet, se cilët do të vazhdojnë dhe cilëve do t’u ‘pritet koka’. Belinda Balluku duket se do të jetë e sigurt në detyrën e shumëlakmuar të superministrisë që drejton, por Rama mund ta surprizojë në finale. Ideja për ta ndarë ministrinë e Energjetikës dhe Infrastrukturës, dhe për t’ia dhënë njërin krah drejtorit aktual të OSHEE Ardian Çela, nuk është e panjohur për KM. Gjë jo fort e lehtë, duke qenë se vetëm si ide ka zgjuar përplasje dhe përpushje lart dhe anash këtij dikasteri që është luanesha e ministrive, sa i takon buxhetit, tenderave, ofertave dhe favoreve.

Një exit për Çelën mund të jetë kandidimi i tij në Durrës duke qenë se qyteti bregdetar drejtohet nga një kryetare e komanduar.

Sidoqoftë, duket se Balluku do të marrë jo pak, sikur të mbetet edhe me gjysmën. Me fat të mirë duket se janë edhe dy gra të tjera në qeveri: Olta Xhaçka dhe Ogerta Manastirliu. E para i duhet për të mos prishur një linjë tashmë komode dhe të ndërtuar mirë me amerikanët, edhe në dritën e ardhjes së afganëve, ndërsa e dyta, sepse të paktën sipas shefit të saj, pandemia është menaxhuar si duhet.

Gjë që, në fakt, anon nga e vërteta, qoftë edhe vetëm për faktin se Shqipëria hyn ndër vendet me një shkallë të respektueshme të vaksinimit të popullatës dhe ka gëzuar një liri relative në krahasim me shumë vende të tjera, në rajon apo në Europë.  E gjitha e pashoqëruar me shifra alarmante të vdekjeve.

Edhe një ministër tjetër nuk duket se ka arsye se pse ta largojë. Arben Ahmetaj drejton një diksater pa portofol, megjithatë një ministri kyçe si ajo e Rindërtimit. Nuk ka arsye se pse Rama të ndërrojë kalë në mes të rrugës në këtë rast.

Të tjerët janë thuajse të gjithë të anuluar në planet e KM. Ose, për të përdorur një shprehje të Ramës ‘do të jeën të ulur në një stol të gjerë rezervash’.

Por, si do të jetë pjesa tjetër e qeverisë? Gjasat më të mëdha mund të jenë të natyrës habitore. Pra emra të rinj; ose pa lidhje të forta politike me Partinë Socialiste dhe me bazën, ose eksperimentalë. Të kësaj natyrës së fundit, edhe pse të pashenjë në rastet e tjera, Rama do të nxjerrë dy tre emra si penela për t’i mëshuar kështu edhe njëherë dëshirës për ta trajtuar qeverinë si pikturë të vetën. Mbetet vetëm për t’u parë se cilit kosovar do t’i besojë një post në qeverinë e tij. Sikur asgjë tjetër, do t’i duhet një sa për ta mbajtur të kollovarizuar qeverinë e tij të re, qoftë edhe për të nervozuar homologun e tij në Prishtinë, Albin Kurtin.

Çka megjithatë ende mbetet për t’u parë dhe përimtuar, nëse i duket silueta kur Rama të shpallë qeverinë e re, është politika e appeasement-it (kënaqjes) të opozitës. Shefi i PS, afërmendsh nuk do të bëjë aleancë qeveritare të ashiqartë me Bashën, por ai mund të zgjedhë disa ministra ‘teknikë’. Të cilët nuk janë të PS dhe as të PD, por te të cilët kjo e fundit mund të ketë akses, apo do t’i lejohet akses.

Kjo, bashkë me emërime të mundshme në krye të superdrejtorive, si OSHEE psh, të njerëzve që janë ose shihen si ‘lidhje të Bashës’, është e vetmja mënyrë se si Rama do të bashkëpunojë me opozitën. Kësisoj ai vazhdon operacionin e eleminimit politiko-ekonomik të Metës dhe LSI dhe, në të njëjtën kohë lubrifikon financat e Bashës dhe të PD. Këta të fundit, të lënë në mëshirën e urisë së dimrit të gjatë tre mandatësh në opozitë do të jenë më të zëshëm, më të figurshëm, më denoncues dhe më acarues apo të rrezikshëm. Rama është në kërkim të një mandati të tretë në të cilin mund të bëjë ca punë të mira. Për këtë i duhet një opozitë e cila i tregon dhëmbët, por nuk kafshon.

Për të siguruar këtë Rama është gati të paguajë ‘darkat’ dhe shpenzimet e veneer-it.

Të fundit