Tre kandidatët në garë për Prokuror të Përgjithshëm, Arta Marku, Fatjona Memçaj dhe Olsian Çela janë paraqitur sot para Këshillit të Lartë të Prokurorisë, ku kanë prezantuar vizionin e tyre.
E para ka dalë Arta Marku, e cila e në fillim të fjalës të saj tha se përvoja dy vjeçare si prokurore e përgjithshme e përkohshme është një avantazh për garën. Marku nuk harroi të përmendë edhe (mos) arritjet.
Në intervistën që zgjati rreth një orë ajo nuk ka ngurruar të përmendë faktin që i është dashur të punojë në kushtet e një presion politik por nuk është ndikuar nga ky presion.
“Kur rastet janë zgjidhur e kam vërtetuar të kundërtën, i fundit për vendimmarrjen e sektorit të dekriminalizmit për kreun e bashkisë Vorë. Nuk është tregues i vogël dhe jo i varësisë politike. Kur isha në periudhë kandidimi dhe nuk kam vepruar e varur dhe për të arritur qëllimet e mia personale”, tha Arta Marku.
Por nuk duhet harruar fakti se rasti i Kajmakut nuk erdhi si hetim i drejtpërdrejtë i prokurorisë, e që sot Marku e “shiti” si sukses të saj për të treguar se nuk varet nga politika, por ishte e detyruar ta ndiqte pasi PD denoncoi publikisht shkeljen e Kajmakut dhe mos mosdeklarimi i dënimit të tij në Greqi për falsifikim dokumentesh në formularin e dekriminalizimit.
E dyta kandidate, që doli para Këshillit të Lartë të Prokurorisë ishte Fatjona Memçaj.
Ajo që spikati gjatë qëndrimit të saj ishte momenti kur ju vu në dukje se emërimi i saj ka detyruar dy institucione të rëndësishme si Prokurorinë e Përgjithshme dhe presidentin të shkelin ligjin, që sipas KLP nuk i plotësonte 7 vjet për tu emëruar si prokurore.
Në përgjigjen e saj Memçaj reagoi teksa tha se “për hatrin e saj” nuk mund të shkelej ligji.
“Për mua nuk ka patur shkelje ligji. Kam marrë 5 vota nga 6 votat e nevojshme. Jam shumë e sigurt as për hatrin tim nuk do kishin shkelur ligjin , jo shkelje ligjore zonjë, por interpretim dhe në vlerësimin e dikujt tjetër në mënyrës se ka gjykuar të tillë”, tha kandidatja.
Kandidati i fundit që shpalosi platformën para KLP ishte Olsian Çela, i cili përflitet edhe si favoriti. Dhe mesa duket është e vërtetë, pasi deklaratat e tij ishin të forta.
I fortë ishte edhe momenti kur Çela përmendi avokatë në Shqipëri, (pa emra konkretë) për të cilët tha se firmën e hedhin atje ku u kërkohet, e jo aty ku duhet.
Tjetër deklaratë e fortë e tij kur nënvizoi se prokurorët kanë aplikuar gjithnjë masa penale të ashpra, por sidomos me shtresat më të dobëta të shoqërisë.
“Avokatët shpesh s’janë avokatë, vendosin firma aty ku u thuhet të firmosin.
Këto masat e sigurimit që ne japim vend e pavend e mendojmë cfarë pasojash shkaktojnë te familjet e atyre që izolohen? A ka qenë e nevojshme vërtet që prokurori në çdo rast të shkojë të kërkojë masa ekstreme? A e kemi menduar që ai personi që kërkohet një masë ekstreme ka një familje, fëmijë, punë? Duke qenë të ashpër, dhe me vjen keq ta them, kemi qenë të ashpër me shtresat e dobëta, ne thellojmë problemet sociale e duke bërë këtë përgatisim breza të rinj që janë në rrugë sot e nesër janë fidanishtet e krimit.”
Këto ishin vizionet e tre rivalëve në garën për Kryeprokurorin e ri. Presim që në 14 dhjetor, ashtu siç Kreu i KLP Gent Ibrahimi ka deklaruar, Shqipëria të ketë Kryeprokuror të Përgjithshëm të ri.
Discussion about this post