Në Gjermani dhe sidomos te Bayern, rregulli është gjëja kryesore. Pre e disiplinës bavareze së fundmi kanë rënë dy lojtarë (asnjëri gjerman). Ata janë Ivan Perisic dhe Javier Martinez.
Kroati nuk ka respektuar orarin e stërvitjes (vendosur nga trajneri Niko Kovac me shumë kujdes), pasi është paraqitur me 6 minuta vonesë. Kjo seancë ishte programuar para ndeshjes me Augsburgun në orën 15:30.
Spanjolli Martinez, i transferuar për 40 mln euro nga Athletic Bilbao në vitin 2013, është paraqitur një minutë pas kroatit. Sipas gazetës gjermane Bild, të dy lojtarët do të gjobiten.
