Vokshi në asamblenë parlamentare të KiE: Zgjedhjet në vendin tonë s’janë të lira dhe as të ndershme

Nga Asambleja parlamentare e Këshillit të Evropës, deputetja Albana Vokshi bëri thirrje që Shqipëria të monitorohet prag zgjedhjeve të 11 majit, pasi demokracia sipas saj është në rrezik.

Vokshi denoncoi në Strasburg edhe aplikacionin “Aktivisti”, të përdorur nga Partia Socialiste, sipas deputetes demokrate për propagandë dhe manipulimin e sjelljes së votuesve.

Vokshi shtoi se “kontrolli i internetit përmes pajisjeve speciale disa javë para zgjedhjeve, përbën një veprim autokratik që minon të drejtat themelore në vendin tonë”.

Fjala e plotë e Vokshit në Asamblenë parlamnetare të KiE-së:

E nderuar Drejtuese e Seancës,

Dua të përgëzoj znj. Kalina-Lukasevica për punën dhe rezolutën e saj. Ajo ngre cështjen e disa kërcënimeve që shpesh janë të padukshme, por që sot nuk janë më abstrakte. Dezinformimi, ndërhyrjet e huaja dhe manipulimi algoritmik e dixhital, gjithnjë e më shumë po synojnë sistemet zgjedhore—sidomos në demokracitë e brishta si ato të Ballkanit Perëndimor. Demokracia është nën sulm—nga jashtë dhe nga brenda.

Ajo që z. Mullen përmendi më parë, lidhur me financimin nga fondacioni Soros, është e vërtetë edhe për Shqipërinë. Ky fondacion ka qenë i përfshirë në hartimin dhe zbatimin e reformës në drejtësi, reformës zgjedhore dhe çdo reforme tjetër të rëndësishme. Këto procese kërkojnë transparencë dhe analizë Urgjente, pasi në vend që të përmirësojnë demokracinë, ato e kanë përkeqësuar atë. Sot shqiptarët nuk marrin drejtësi – një çështje në gjykatë zgjat 15-20 vite. Sipas raportit të OSBE/ODIHR, zgjedhjet në Shqipëri nuk janë as të lira dhe as të ndershme. Rekomandimet nuk janë zbatuar.

Kemi qenë dëshmitarë, të keqpërdorimit të aplikacioneve si “Aktivisti”, i përdorur nga Partia Socialiste në pushtet në çdo palë zgjedhje – për propagandë, manipulim të sjelljes së votuesve, intimidim të nëpunësve civilë dhe heshtje të kundërshtarëve politikë.

Situata bëhet akoma më alarmante kur bështet bashkë me korrupsionin endemik, përkeqësimin e sundimit të ligjit dhe centralizimin e pushtetit.

Nevojitet një plan që shtrihet përtej kufijve të BE-së, për të mbrojtur vendet kandidate si Shqipëria, Moldavia, Gjeorgjia etj. E ky plan të furnizojë në planin e integruar evropian.

Duke kërkuar përgjegjshmëri nga platformat si TikTok, Meta dhe X, ne duhet të mbrojmë lirinë e fjalës, një e drejtë themelore.

 Vendime si ai I ndalimit të TikTok nga Kryeministri i Shqipërisë, dhe kontrolli i internetit përmes pajisjeve speciale disa javë para zgjedhjeve, janë veprime autokratike dhe minojnë të drejtat themelore.

Mesazhi ynë duhet të jetë i qartë:

Demokracia fillon me zgjedhje të lira dhe të ndershme.

Faleminderit.