“Gati t’i përvishem punës”, profesori i njohur i jep disa sugjerime Yuri Kim: Kur të mbyllni mandatin, bëjani vetes këtë pyetje

Dje, nisi zyrtarisht detyrën në Tiranë ambasadorja e re e Shteteve të Bashkuara të Amerikës, Yuri Kim.

Në reagimin e saj publik përmes rrjeteve sociale, Kim tregoi se është gati “t’i përvishet punës” në Shqipëri.

Reagimet pas këtij postimi kanë qenë të shumta, por më pikantja duket komenti i lënë nga profesori i njohur Përparim Kabo.

Në komentin e tij, Kabo i ka ofruar ambasadores së re disa sugjerime, duke i treguar në një farë mënyrë “terrenin” që e pret gjatë mandatit të saj.

Komenti:

Mire se erdhe zonja Ambasadore. E drejte si edhe thonë gati ti përvisheni punës. Pa dashur të hyj në detyrën tuaj si diplomate që është detyrimi që ju keni ndaj Departamentit te Shtetit dhe Shtëpisë se Bardhë, si qytetar i Shqipërisë dëshiroj qe modestish tu sugjeroj…

Në vendin tonë nuk është e vështirë të gjesh përbetime in extremis dhe të takosh po aq mosmbajtje fjale. Tek ne gjen me bollëk nga ata qe te gjithë shoqërinë e masin me interesin e xhepit të tyre dhe përbetohen për interesin shoqëror dhe kombëtar.

Nuk është fort e lehtë që mes atyre që përbetohen për dashurinë ndaj SHBA të ndash ata që vërtetë duan me ata qe vetëm te duan kurrë nuk mësuan as në jetë e as në breza.

Juve ju pret populli shqiptar që pret zbatimin e reformës në drejtësi dhe ndëshkime reale të krimit , korrupsionit dhe politikanëve te bërë njësh me ta…Kur të mbyllni mandatin kjo do duhet të jetë pyetje që do i bëni vetes tuaj zonja e nderuar Ambasadore…

Kemi kohe që ju presim si drita, them drita sepse drita është pa mure dhe pa caqe….ndaj kur themi drita mendojmë qe së bashku me faktorët e besueshëm te bëhet ndryshimi i shumë pritur. Ju jeni lindur në një ishull dhe njerëzit e ishujve kanë një veçori, ngado shohin detin horizontin e paane dhe po kështu ata vetë e fitojnë ketë tipar te jenë jo të mbyllur.

E kam mësuar këtë gjë tek kam studiuar jetën e Victor Hugoit që jetoi 19 vite ne ishull dhe çdo mëngjes e maste shikimin me horizontin. Nga sot njerëzit këtu ne Shqipëri nisin e masin ndryshimin…Dalsh faqebardhë.