Ish-deputetja e Partisë Demokratike, Albina Dede shprehet se Arta Marku do të qëndrojë për 7 vite në krye të Prokurorisë së Përgjithshme. Në një intervistë për ‘Panorama’, Dede flet edhe një herë tjetër për lidhjet familjare me Markun, ndërsa vlerëson integritetin profesional të saj.
“Kam bindjen se Arta Marku do të vijojë të jetë Prokurore e Përgjithshme e Shqipërisë në 7 vitet e ardhshme. Brenda pak kohe të ushtrimit të detyrës së saj, Arta ka për të treguar aftësitë e saj profesionale, çfarë do të krijojë bindjen se ajo është njeriu i duhur në krye të organit të akuzës. Gjatë gjithë karrierës së saj, ajo nuk ka asnjë problem me drejtëinë apo hapësira ku politika mund t’i ndërhyjë, prandaj jam e bindur se ajo është lirë në ushtrimin e detyrës që i është ngarkuar”, ka thënë Dede.
Albina Dede kërkon që të ndahet aksioni i Partisë Demokratike nga emri i Arta Markut, pasi siç shprehet ajo, kryeprokurorja e re nuk është përzgjedhje e kryeministrit Edi Rama, por e SHBA-së.
“Një gjë duhet ta them me bindje, se kryeprokurorja e re Arta Marku nuk është prurja apo investimi politik i Edi Ramës. Arta është një investim dhe përzgjedhje e Shteteve të Bashkuara të Amerikës. Ka kryer shkollime dhe specializime në SHBA në shërbim të formimit të saj profesional dhe duke vlerësuar integritetin e treguar në detyrat që ka mbajtur, edhe është mbështetur nga SHBA në marrjen e kësaj detyre. Jam tërësisht e bindur se Edi Rama nuk përzgjidhte kurrë një njeri, familja e së cilës ishte me bindje të djathta. Por, siç e theksova më sipër, Marku ka qenë përzgjedhja e SHBA-së për shkak të formimit dhe integritetit të lartë profesional që ka treguar”, është shprehur Dede.
Financuar Nga Bashkimi Europian
