Maqedonia e Veriut do të paguajë pagat e 260 mijë punonjësve, shumë herë më shumë se sa Qeveria Shqiptare. Këtë e pohoi Ministri i Ekonomisë i Maqedonisë së Veriut Kreshnik Bekteshi, i cili në emisionin “Opinion”, ku kishte përballë dhe Ministrin Ahmetaj, të caktuar për krizën e koronavirusit, deklaroi se “paketa ekonomike për përabllimin e pasojave të pandemisë së koronavirusit përfshin 260 mijë punonjës”. Sipas Bekteshit, në paketën e qeverisë do të përshihen të gjitha bizneset që do të kenë rënie të xhiros deri në 30%, ndryshe nga qeveria shqiptare që ka caktuar vetëm një numër biznesesh të përfshira në paketën e ndihmës ekonomike.
Ai deklaroi më tej se paketa e dytë financiare e Maqedonisë së Veriut do të jetë 120 milionë euro. “Vlera e paktës së dytë financiare në Maqedoninë e Veriut është 120 milionë euro”, tha Bekteshi ndërsa në të parën ai shtoi se ishin “subvencionuar kontributet në sektorët më të goditura.” Por vendi fqinj nuk ka lënë jashtë vëmendjes as sektorin e turizmit, për të cilin aktualisht ka parashikuar një fond prej 2.5 milionë euro. Në Shqipëri, qeveria ka parashikuar të ndihmojë 60 mijë punonjës të biznesit të vogël ose të vetëpunësuar, duke u dhënë një pagë prej 26 mijë lekësh të rinj.
Financuar Nga Bashkimi Europian
