Aleatët nuk do të zbarkojnë

Edvin Cami

Sot është koha që të gjithë të gjejmë rrugë e mënyra për të folur e për t’u shprehur, për të kumtuar e përcjellë mesazhe te njerëzit, për të biseduar me njëri-tjetrin. Kjo është domosdoshmëri për mbrojtjen e lirisë dhe këto 33 vjet histori na kanë treguar se liria nuk është diçka që e gëzojmë vetvetiu, por që kërkon përkujdesje e sakrifica të vazhdueshme për ta mbrojtur.

Nëse një shoqëri humbet lirinë, humbet gjithçka. Ky nuk është thjesht një slogan.

Vini re! Që kur Partia Socialiste u rikthye të sundojë këtë vend rreth 11 vjet më parë, pasi dërrmoi përmes krimit lirinë e qytetarëve tanë për të votuar të lirë, nisi hap pas hapi edhe kufizimin e madje asgjësimin e mirëqenies së qytetarëve, talljen dhe shpërfilljen e djersës e të gjakut të tyre, duke shkatërruar shtëpitë, bizneset, pronat e tyre.

Ndaj nëse je një qytetar që të kanë prishur shtëpinë apo shtetëzuar pronën, dije se kjo ndodh pasi qeveria nuk i trembet më votës tënde. Nëse je një qytetar që monopolet e qeverisë dhe ekonomia e krimit po të rrënojnë biznesin, dije se kjo ndodh pasi qeveria nuk i trembet më votës tënde. Nëse je një qytetar që përballesh me çmime të papërballueshme apo një fermer i braktisur që të kanë mbetur prodhimet në fushë, dije se kjo ndodh pasi qeveria nuk i trembet më votës tënde. Nëse je një qytetar që rrezikon burgun se nuk ke të paguash energjinë, dije se kjo ndodh pasi qeveria nuk i trembet votës tënde.

Nëse je një qytetar që, përballë kësaj gjendjeje, ke parë bijtë, bijat, nipërit, mbesat e tua të braktisin vendin dhe të emigrojnë, dije se kjo ndodh pasi qeveria nuk i trembet më votës tënde. Nëse je një qytetar që e merr ende rrogën në administratën e shtetit apo je mësues në arsimin parauniversitar dhe, nëse s’të kanë flakur ende nga puna, të detyrojnë të mbyllësh gojën si në 1989-ën dhe të shpërndash “likes” e lajka në rrjetet sociale për propagandën e Partisë e të qeverisë, pa dyshim që ti e di se kjo ndodh sepse qeveria nuk i trembet më votës tënde. E nëse s’je asnjë nga këta dhe hesht, atëherë dije se nesër do të jetë radha jote.

Propaganda e Partisë Socialiste, që nuk buçet vetëm nëpërmjet televizionit dhe rrjeteve sociale, por që u pëshpëritet edhe në vesh qytetarëve nëpërmjet patronazhistëve të maskuar si njerëz objektivë që, në fakt, kanë rilindur Sigurimin e Shtetit, ka punuar e punon për ta topitur çdo reagim tuajin, për të demotivuar çdo pjesëmarrje tuajën në zgjedhje e në protesta, teksa ju thonë në vesh, në kafe, në autobus se në këtë vend, qeverisjen e vendosin ndërkombëtarët dhe jo shqiptarët.

Kështu, dikur ju thuhej se ndërkombëtarët e kanë vendosur që pushtetin t’ia lënë një herë njërit e një herë tjetrit, tetë vjet PD-së e tetë vjet PS-së. Dhe kush i besoi kësaj, priti gjersa e pa se pasi kaluan tetë vjet, qeveria e Partisë Socialiste ishte ende në pushtet. Juve ju pëshpëritej se ndërkombëtarët kanë vendosur që t’ju qeverisin njerëz të rinj dhe të largojnë të vjetrit. Kush i besoi kësaj, priti e priti gjersa sot sheh Edi Ramën teksa rrudhet, thinjet e plaket në pushtet dhe ndërkombëtarëve s’duket t’u jetë prishur lumturia aspak.

Ju thuhej se ndërkombëtarët do të bëjnë drejtësinë, do të largojnë nëpërmjet saj të ashtuquajturën klasë të vjetër e të korruptuar nga politika për ta çuar para drejtësisë, po sot po shihni se ata që izolohen e hetohen janë drejtuesit e opozitës dhe armiqtë e brendshëm të Partisë e të qeverisë, ndërsa vetë kryeministri sundon i qetë e i sigurt dhe drejtësia e re të ndërkombëtarëve është kthyer në gjyqin e rilindur popullor, administruar madje edhe nga njerëz të Sigurimit të Shtetit.

Ata opozitarë që ende presin që hallet e shqiptarëve t’i zgjidhin ndërkombëtarët, janë po aq tragjikë sa ata që në vitin 1945 prisnin plot shpresë zbarkimin e aleatëve anglo-amerikanë për të çliruar Shqipërinë nga komunistët. Ndaj, të dashur qytetarë të pakënaqur me gjendjen tuaj, mos prisni kot, se aleatët nuk do të zbarkojnë; se ndërkombëtarët nuk kanë as nge e as dëshirë të merren me hallet tuaja, por janë këtu për hallet e veta. Vetëm qytetarët e këtij vendi janë ata që mund ta ndryshojnë gjendjen e tyre dhe askush tjetër s’do ta bëjë atë për ta.

E ndryshimi nis e mbaron te liria. Ndaj le të shërbejë kjo protestë si një shkëndijë për të filluar ndryshimin brenda nesh! Po ashtu, le të shërbejë kjo protestë, me një prani kaq të madhe, që atyre individëve prej bashkësisë ndërkombëtare që mendojnë se mund të thonë e të bëjnë ç’të duan në këtë vend, t’u përcjellë mesazhin se Shqipëria nuk mund të jetë një “Lebensraum” për ta, pasi ne, qytetarët e këtij vendi, qëndrojmë për sovranitetin e vendit dhe të opozitës; dhe siç brohoritej në protestat e para antikomuniste në ish-Evropën Lindore, “Wir sind das Volk”, ne jemi populli!

*Fjala e mbajtur dje në protestën e opozitës.