Karma is…një fshat në Pukë

Alfred Lela

Sot është 21 janar. Një redaktore programi televiziv më bëri një ftesë për në emisonin me temë… 21 janari i para 12 viteve. Përgjigjia ime: "Mendoj se nuk duhet dalë fare për këtë. Ka 12 vjet që flitet për qeverinë e para 10 viteve për të mbuluar skandalet e qeverisë së prej 10 viteve. Mënyrë më të mirë për t’i zgjatur jetën pushtetit nuk ka.”

Këtu po vazhdoj një dialog (imagjinar) me redaktoren e emisionit në fjalë, dhe me kolegët e saj, të cilët herë i shtyn cektësia e çështjeve-lajm, herë të tjera shtysat politiko-ekonomike të bosëve.

Sigurisht, mund të bësh një debat për 21 janarin 12 vjet më vonë, siç mund të debatosh edhe për Reformat e Tanzimatit apo amerikanët që u vranë në Mamurras në kohën e Zogut, e me radhë. Mund të bësh një emision edhe për Karmën, e kam fjalën për fshatin pukjan, por edhe për “karma is a bitch” të kryeministrit tonë luteran, i cili i neveritur nga indulgjencat e krishtera të Europës, nguli me tërsëllëmë 95 tezat e tij në dyert e Unionit. Më e para ndër to lexon “Karma is a bitch”.

Nëpërmjet kësaj shprehjeje, përdorur epshëm mes gocash instagrami, kryeministri ka dashur të thotë, në një debat të organizuar nga revista POLITICO në Davos, se nuk jemi vetëm ne, qeveria e Shqipërisë, të korruptuar, kriter mbi të cilin na mbani të mënjanuar, ju të Europës “kurvë e motit”, por edhe vetë, duarngjyer jeni. Me “ju” ai ka ndërmend skandalin në Parlamentin Europian, me disa funksionarë, ndër ta një eurodeputete greke, të ekspozuar në atë që u pagëzua “Qatargate”. Shkurt, pranimi i darovitjeve, me para në dorë, për lobime në favor të petrolshtetit të fuqishëm arab të Katarit.

Meqë është 21 janar, dhe meqë korrupsioni i parlamentarëve europianë krahasohet me të administratës së Ramës, ata ngjajnë sa fshati Karmë i Pukës me fshatin Shengen në kufirin trekëndësh mes Luksemburgut, Francës dhe Gjermanisë, po guxoj të krahasoj dy gjëra, besoj më të krahasueshme, brigjet e të cilave nuk t’i shqyejnë këmbët as gojën, si paralelet që heq kryeministri ynë. Motivin apo pretekstin pas protestës së 21 janarit, dhe letargjinë apo mungesën e protestës për skandale të shumta, pa një 21 janar të dytë…e kam fjalë këtu në terma të rebelimit, jo të viktimave.

Kështu, nëse kujtesa na shërben saktë, 21 janari 2011 u organizua nga Edi Rama dhe Partia Socialiste në opozitë, si reagim për një video-përgjim, ku shfaqeshin ministri Dritan Prifti dhe shefi i tij Ilir Meta. Shkurt muhabeti, në video shkëmbeheshin fjali në qendër të të cilave termi 700 mijë euro u bë motivi që ngriti ‘revolucionin’ e 21 janarit, në gijotinën e të cilit ranë katër vetë, të pagëzuar me pas dëshmorë nga Rama.

Fast forward 12 vjet dhe shuma që u bë ajër për të ngjitur balonën e ‘revolucionit’ në qiellin socialist të Shqipërisë, 700 mijë eurot, ngjajnë sot si një shaka e trashë, si pare xhepi, aq sa mund t’i ketë edhe i biri i papunë i një pastrueseje të drejtorëve të rangut të dytë dhe të tretë, në administratën e Ramës.

Me një deduksion logjik, atij të detit që është bërë kos, i bie që kur vrima e fundit e kavallit, ka aq para sa në kohët para erës së Ramës kishin ministrat e lartë, Shqipëria “ka ecur para” dhe revolucioni i 21 janarit, megjithëmend mori katër vetë, por ia vlejti barra qiranë…etërit e revolucionit, Edin, Elisën, Tomën dhe Taulantin, i ktheu nga zdromsa në fat cats, të tilla sa edhe pastrueset e kohës së tyre i bëjnë ministrat e Berishës të duken si personazhe merhume të përrallës eduardiane “ne nuk vjedhim si ata”.  

Edhe kur krahason shumën e Qatargate-it, 600 mijë euro në 16 shtëpi brukselase, aq sa pastruesja e “pastrueseve” të Ramës kishte përlarë në një të vetme, karma nuk bëhet dot kurvë. Pa harruar këtu një dallim të hollë: PE është një superstrukturë mbikombëtare, jo një shtet nacional, aq më pak një i varfër si Shqipëria. Edhe vjedhja kategorizohet (hiq rastin puritan të Martin Luterit dhe Ramës): krejt ndryshe të vjedhësh një shtet të huaj për të lobuar për interesat e tij në një superstrukturë supranacionale, dhe t’u marrësh bukën, rrugët dhe punët publike bashkatdhetarëve dhe vendit tënd. Karma që Rama kërkon ta hedhë në prehrin europian është megjithëmend një kurvë…për faktin se nuk rri aty ku e vendosin.

Për të qenë cinik, dhe politikisht jokorrekt deri në fund, të paktën PE-në po e vjedh Eva Kaili, një grua e bukur. Për vete do të ndjehesha më i qetë me dorën e saj në xhep. Sidomos kur e krahason me këto lopët e administratës së Ramës, të cilat asnjë plastikë nuk i shpëton nga palët që babëzia u ka latuar në portret. Në rastin e tyre karma is… a superbitch!

Kështuqë krahasimi, relativizimi dhe banalizimi që Edi Rama u bën fenomeneve në vendin që ai udhëdreq, që me gjasë e ka marrë mes Shilës e Karibdës, por po e çon mes Sodomës dhe Gomorrës, mund të ngushëllojë turmën gojëhapur që heroizon, sa Skënderbeun e Elisës, aq Luisin e Sarës, por ata që mbeten i step në marrëzinë e tezës dhe në paturpësinë e autorit.

Programet televizive vazhdojnë ndërkohë të flasin për qeverisjen e Sali Berishës, që vuri kapak para 10 vjetësh. Krejt si tekstet e Leximit dhe Historisë së Enver Hoxhës që shkruanin për begatinë në socializëm dhe mjerimin në kohën e Mbretit Zog.

Nuk u vëmë faj, por në dukje mund t’i vëmë: të gjithë kërkojnë Luisin e tyre televiziv ose duan të fshehin Luisin që duhet të dalë nga "shtëpia". Gazetari në shërbim publik? Tobestrakfurullah!