Kush po ‘qan’ për PD-në?

Nga Hysni Gurra

Njerëzit që kanë qenë publikisht kundër PD-së prej një dekade, ata që kanë folur, kanë vepruar dhe kanë votuar kundër saj, janë po këta njerëz që sot “qajnë” për PD-në dhe kërkojnë reformimin e saj në banaqet televizive.

Nuk para përdor emra të përveçëm në shkrime, por është e domosdoshme, sepse “muzika” sapo ka rinisur sërish.

Kush bën pjesë këtu?

Edi Rama me taborrin e tij, që e tha publikisht se duhet ndërruar opozita në sheshin “Skënderbej”, ku falënderoi Agron Shehajn dhe Adriatik Lapajn.

Janë edhe njerëzit e Lulzim Bashës në media, të cilët nga mëngjesi në darkë kanë punuar kundër Partisë Demokratike:

Fitim Zekthi, anëtar kryesie me Lulin, Ergys Mërtiri, anëtar kryesie i Lulit, Redi Shehu, Ervis Iljazaj, Preç Zogaj, Edvin Kulluri që garoi vetë dhe s’mori as 100 vota, Bardh Kadilli ish-deputet, prej Afrikës së largët futet edhe ky në skype e qan për PD, thuajse të gjithë të njohur si ithtarë të Bashës.

Është e drejta e tyre të jenë ithtarë të kujt të duan dhe të gjykojnë, por demokratët duhet ta dinë se ata nxjerrin lot krokodili nëpër banaqe televizive, kinse u dhimbset PD-ja, për të cilën kanë derdhur djersë që të asgjësohet.

Këta mund të dilnin në banaqet televizive dhe të flisnin, por për Koalicionin Euroatlantik të Lulit që e mbështetën, jo për PD.

Mjerisht, disa që janë ende deputetë të PD-së, edhe në fushatën që sapo u mbyll, nuk lanë asnjë minutë pa folur e punuar kundër Partisë Demokratike që u dha gjithçka — edhe në mënyrë të pamerituar:

Dash Sula, 3–4 mandate deputet. Dash Shehi dhe Enkelejd Alibeaj, një jetë në politikë, të cilët vetëm kanë marrë nga PD-ja, tani që dolën vetëm, panë vetë sa u vlen “lëkura” te shqiptarët — nuk morën vota as sa një listë ziafeti synetlliku. Ferdinand Xhaferri apo Flutura Açka janë po ashtu emra që kanë punuar ditë e natë kundër PD-së në terren.

Këta njerëz kërkojnë sot reformim të PD-së?!

Hapni televizorin: janë mobilizuar më shumë se kurrë kundër PD-së.

Këta nuk kanë arritur as deri aty ku shkuan vëzhguesit ndërkombëtarë, të cilët e thanë që në rreshtin e parë të raportit: gara nuk ka qenë e barabartë.

Këta nuk flasin as për patronazhimin, as për presionin, as për blerjen e votave, as për shantazhin ndaj administratës, se njerëzit e tyre punojnë të gjithë në administratën e Ramës.

Njerëz që lodhen duke folur e punuar kundër PD-së, shënjestrën e kanë mbi njeriun që punon 18 orë në 24 për PD-në.

Këta qajnë me bariun, lehin me qenin dhe hanë me ujkun, thotë një fjalë e urtë arabe.