Opozita parlamentare ndryshon mendje te ‘Ligjet’: Duam ulje të pragut zgjedhor, nga 5 në 2%

Opozita e ashtuquajtur parlamentare duket se është tërhequr nga një prej pikave të propozuara për ndryshime kushtetuese. Gjatë diskutimeve në mbledhjen e përbashkët e Këshillit për Legjislacionin dhe Komisionit për Çështjet Ligjore, Administratën Publike dhe të Drejtat e Njeriut, ishte fillimisht realtori Korab Lita ai i cili ka kërkuar ulje të pragut, nga 5 në 2%.

“Pragu 5% dhe ndalimi i koalicioneve ngushtojnë hendekun dhe nuk është demokratik. Pragu 2% e plotëson më së miri nevojën e shfaqur. Propozoj që në pikën 2 të nenit të parë, të bëhet jo më pak se 5% të votave të vlefshme por 2% të votave të vlefshme”, tha Lita, propozim që u mbështet edhe nga deputetët Myslim Murrizi dhe Rudina Hajdari

“Propozimi i pragut zgjedhor 5% nuk ka ardhur nga grupi demokrat, ka ardhur nga deputetë të tjerë. Ulja e pragut do ishte më e drejtë dhe do të krijonte konkurrueshmëri”, tha Hajdari, ndërsa Murrizi tha se “në propozimin fillestar ka qenë 5%. Por në ndonjë mbledhje tjetër të merret parasysh që të ndryshohet nga 5% në 2%”.

Nga ana tjetër, deputetja e PS Klotilda Ferhati deklaroi se pragu 2% i duket i ulët, por kjo duhej diskutuar.

Edhe Alket Hyseni tha se për këtë pikë, duhet të diskutohet edhe me ndërmjetësimin e 4 ekspertëve.

“Pragu i propozuar është diskriminues në gjykimin e ekspertëve, shumica e vendeve demokratike e kanë pragun të lartë. Nuk është shifër e dalë rastësisht. Pragjet e larta garatojnë qeverisje stabël, të ultat garantojnë përfaqësim të partive të vogla.

Në opinionin tim është më i mirë pragu i lartë. Shqipëria nuk e ka luksin për të patur qeverisje që shpërndahen në 5-7 parti politike.

Duhet dakordësojmë me relatorët e tjerë. kjo kërkon analizë me ekspertët. Të mblidhemi 4 relatorët në një mbledhje tjera”, tha Hyseni.

Kujtojmë se opozita ka propozuar ndryshime kushtetuese për hapje listash dhe heqje koalicionesh, nismë që është mbështetur së fundmi zyrtarisht edhe nga PS.