Një ditë pasi Komisioni Europian në raport progresin për Shqipërinë nuk ka mbajtur një qëndrim pozitiv për praktikat e ndjekura për projektet me partneritet publik-privat, kryeministri Edi Rama sot nga foltorja e Parlamentit është përpjekur ta ‘rrëzojë’, duke i cilësuar PPP si metoda nga të cilat përfiton publiku, kur shteti nuk ka kapacitete për të ofruar një shërbim të caktuar.
Duke marrë rastin e ‘check up-it’ me Vilma Nushin, Rama tha se nga kjo kontratë kanë përfituar mbi 1 milionë njerëz, duke bërë kontroll shëndetësor falas.
“Ajo procedurë falas ishte e pamundur para PPP. Për analizat bazë njerëzit paguanin 80 mijë lekë, që financohen nga buxheti në një proces partneriteti me privatin që nga ana e tij nuk ka marrë paratë e parashikuara për të dhënë këtë shërbim në vite, por ka investuar dhe çdo vit merr një pjesë të fondeve nga buxheti. PPP ose koncesione nuk janë metoda kriminale, skema abuzive për përfitime në kurriz të popullit, por modele financimi për të bërë të mundur rritjen e cilësisë së një shërbimi për publikun apo zhvillimin e një infrastrukture që me kapacitetet e shtetit nuk e bën dot. Prej tyre përfiton publiku”, u shpreh kryeministri.
Ndërkohë, dje Komisioni Europian me qëndrimin e tij ndaj PPP-ve ishte në të njëjtën linjë me institucionet ndërkombëtare, sidomos Fondi Monetar Ndërkombëtar, që ka paralajmëruar për rreziqet fiskale që i vijnë buxhetit nga përqendrimi në projektet e partneritetit publik privat dhe për faktin që pjesa më e madhe e tyre janë borxh i fshehur.
Rporti thekson se përfshirja e shtetit dhe subvencioneve publike mbetet përgjithësisht e ulët në ekonominë shqiptare, por rritja e mbështetjes tek PPP ngre potencialin e ndikimit të shtetit në tregje të caktuara. Qeveria është angazhuar gjithnjë e më shumë në projektet PPP-të, veçanërisht për energjinë dhe transportin, ku ka marrëveshje çmimesh apo vëllimi për shërbime dhe mallra. Pagesat e qeverisë për këto kontrata, sipas ligjit kufizohen në 5% të të ardhurave tatimore të vitit të kaluar dhe për vitin 2018 ky kufi thuhet se është respektuar. Shumica e kontratave ekzistuese të PPP janë përzgjedhur në bazë të propozimeve të pakërkuara, të cilat reduktojnë konkurrencën në prokurime. Raporti vlerëson rishikimin e legjislacionit për kufizimin e projekteve të pakërkuara. Megjithëse legjislacioni i prokurimit kohët e fundit është përmirësuar, zbatimi i prokurimit publik ka mbetur i mangët dhe vazhdon të perceptohet si jo transparent, thuhet në raport.
