“Shtimi i testimeve na ndihmon për hapjen”, Basha: Duhet plan për ekonominë që të mos shkojë në koma

Kryedemokrati Lulzim Basha, në një video-konferencë me gazetarët, përsëriti thirrjen e tij për shtimin e testimeve për parandalimin e koronavirusin. Basha u shpreh se duhet të fillohet me stafet mjekësore, me policët, Forcat e Armatosura dhe të gjithë ata që punojnë në vijën e parë të përballjes me COVID-19.

“Dua të bëj një paraqitje të disa çështjeve kryesore që kanë qenë në qendër të vëmendjes së qytetarëve edhe të opozitës. Të dhënat e fundit tregojnë një zgjerim të hartës së të infektuarve, ne Kukës dhe Mallakastër. Sot kemi 6 anëtarë të personelit mjekësor të infektuar. Kjo sjell vëmendje të rritjes së testimit. Duke nisur me testimin e stafeve mjekësore dhe me punonjësit e vijës së parë, të policisë, të Forcave të Armatosura, të administratës, furnitorët, njerëz që punojnë në shërbim të tregtisë. Testim dhe prekja e situatës në thellësinë e saj do të na japë shifra të sakta dhe përhapjen e vërtetë të infeksionit. Në besimin tonë, testimi nuk po bëhet në masën e duhur.

Basha u shpreh se kërkesës së opozitës për shtimin e testimeve, i janë bashkëngjitur edhe përfaqësues nga maxhoranca. Sipas tij, nëse nuk ndiqet strategjia e testimit masiv, do të jetë e vështirë hapja dhe rikthimi në normalitet. “Kërkesës tonë për testimin i janë bashkangjitur edhe zëra të ekspertëve kombëtarë, dhe zëra të maxhorancës, ndaj përsëris sot, që të ndryshohet strategjia për testimin. Nëse ne prekim sipërfaqen e problemin, majën e ajsbergut, do ta kemi të vështirë që të drejtojmë vendin drejt hapjes, që t’i japim fund qëndrimit në shtëpi dhe mbylljes në ekonomi. Është e pamundur që njerëzit të mbahen në shtëpi pa plan”.

Basha tha më tej, se prioritet absolut është zbulimi i infeksionit dhe gjurmimi i kontakteve. “Sa i përket pasojave që kjo ka te qytetarët dhe stafet mjekësore, nëse ne lejojmë infektimin e mjekëve dhe infermierëve, ne dobësojmë vijën mbrojtëse që ka shoqëria. Prioritet absolut duhet të jetë zbulimi i infeksionit, gjurmimi i kontakteve. Ndaj kërkesa jonë është që në bazë të ligjeve në futi të normohen përmes VKM, për të bërë të mundur gjurmimin edhe izolimin e infeksionit, pa të cilin karantina s’do të ketë kuptim. Ky proces kërkon protokolle të qarta nga njerëzit në terren. Dua të përsëris dhe një herë thirrjen për pajisje mbrojtëse për personelin mjekësor.”, tha Basha.

Basha foli dhe për situatën ekonomike, duke u shprehur se situata është e tmerrshme. Ai kërkoi që qeveria të shpërndajë sa më parë paratë për familjet në nevojë, apo pakot ushqimore. “Ekonomia duhet të mos kalojë në koma. Pamjet që na shfaqen në media janë të tmerrshme. Qytetarë që humbin vendin e punës, që shkaktojnë një situatë, ku mijëra familje në nevojë nuk kanë marrë ndihma financiare dhe as paketa ushqimore. Po rritet numri i familjeve që nuk marrin ndihma. Autoritetet duhet të shpërdajnë paratë ose ushqimet. Të bëhet lista me ata që përfitojnë. Transparenca na jep mundësinë të shikojmë se kush ka përfituar dhe kush jo. Qeveria është e vonuar në ndihmat që jep”, tha Basha.

Kryedemokrati kërkoi nga qeveria që të ketë një plan, me qëllim që biznesi të mos largojë njerëzit nga puna. ““Synimi duhet shpallur është që të ketë masa shtesë e biznesi të mos detyrohet të largojë njerëzit nga puna. Thirrja për të paguar punëtorët në kohë pandemie është thirrje për falimentim. Shqiptarët duhet t’ua japësh sigurinë e daljes nga karantina, pa asnjë rrezik të shtuar. Beteja është më virusin. Virusi luftohet, njerëzit ndihmohen. Qeveria të jep përshtypjen sikur po lufton njerëzit. Duhet një plan i organizuar që duhet të nxirret publikisht. Nuk thuhet e vërteta e plani duhet të bëhet publik, sepse vetëm e vërteta do të na çlirojë. Vendi ka nevojë për plan strategjik për të dalë nga situata e pandemisë së Covid-19. Pa plan strategjik, ekonomia jonë e brishtë do të ketë probleme. I bëj thirrje qeverisë që të rrisë fondin e emergjencës. Koha nuk pret”, u shpreh Basha.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm