Alfred Lela
Tërmeti i 26 nëntorit nuk shembi vetëm ndërtesa, vrau dhe plagosi njerëz, por risistemoi edhe pretendimet apo frikërat politike në të dy kampet kundërshtare të Tiranës. Kryeministri, përgjatë gjithë mandatit të dytë qeveritar, ka qenë nën trysni të pareshtur, breshëritë e së cilës i vinin nga të katër anët. Duke filluar nga ‘njollat’ e ministrave të dyshuar si të korruptuar apo të përfshirë në veprimtari të paligjshme (rasti Tahiri) dhe deri te pamundësia për ta çelur kanat dritaren e integrimit, prej të çarës së të cilës duket vetëm aq shpresë sa për të mos ia shkrepur vetes.
Këto dhe dalja e opozitës nga sistemi, me pretendimin se nuk bashkëpunohet në një vend pa përfaqësim, i rënë nëpërmjet vjedhjes së zgjedhjeve, krijonin te një pjese e publikut, në mos nevojën, të paktën perceptimin se me këtë mbingopje retorike dhe luftë në terren vetëm zgjedhjet e parakohëshme do të ishin zgjidhja.
Mbi këtë trase hodhën hekur e beton edhe zgjedhjet e fund-qershorit të këtij viti, ku opozita nuk mori pjesë, gjë që ktheu reminishencën e votimeve njëpartiake të komunizmit. Opozita kërkonte zgjedhje të parakohëshme për të paketuar në një parlamentaret dhe lokalet, edhe pse një pjesë e komentariatit politik shprehej se Bashës nuk i interesonin; ngaqë nuk ishte gati, ngaqë nuk donte ta afronte humbjen, ngaqë vazhdonte të ishte poshtë në sondazhet e opinionit.
Si për të kundërshtuar këta zëra, por edhe për të mbushur një vakum që po hapej poshtë këmbëve të radikalëve opozitarë nga fakti se ardhja e shtatorit nuk po takohej me premtimin e kryetarit të PD se vjeshta do të vazhdonte ‘revolucionin’ që ndërprenë zgjedhjet e 30 qershorit, Basha i çoi bazës një qarkore dhe sekretarëve në qendër një porosi që të përgatiteshin për zgjedhje të parakohëshme. Sinjalet që i shkonin shtypit pro apo afër opozitës ishin të sprucuara me lëndë nga kjo shpresë.
Askush nuk mund të thotë, veç ideuesve të saj, se a ishte një shpresë për të mos i dhënë fund të gjithë shpresës apo një busull e qartë e strategjisë elektorale të PD.
Rama m’anë tjetër vazhdonte të rezistonte në jerm si ai kali që ujku shqyes i dukej mirazh ëndrre.
Derikur erdhi tërmeti që i shkundi kundërshtarët politikë duke i dhënë secilit nga një komfort të huaj për çdo shqiptar tjetër. Të zhytur në vilat e sigurta, të dyja në periferi të Tiranës, ata u hodhën në emergjencë me hovin e atyre që e dinë se bad news is not all bad.* Kryeministrit i jepej mundësia të rimishërohej në 2013-ën duke u riofruar si politikan i shpëtimit, rimëkëmbjejes, rindërtimit, new culture-it, apolitikës etj., duke i kthyer ERTV-së së tij zhanrin e munguar të aksionit. Kjo do të thoshte se sirenat e skandaleve të vjetra të mos ndillnin më askënd, siç do të thoshte se skandalet e reja duheshin kamufluar se s’bën. Me këtë rast që i dha tërmeti ai mund të shkonte i pashqetësuar elektoralisht deri në zgjedhjet e kalendarit: verë 2021.
Kryetari i PD mund të thuhet se u përshkrua nga e njëjta frymëmarrje lehtësimi. Tërmeti nuk e kushtëzonte më me hendekun e thellë mes retorikës së tij ‘të ditës së kiametit’ dhe pamundësisë që ta zgjidhte këtë ububu me mjete politike, si psh zgjedhjet e parakohëshme. Tërmeti u siguronte të gjithëve kohë për t’u shtrirë dhe për të lëpirë plagët e keqkuptimeve dhe të pamundësive. Në cinizmin mpirës që shoqëron portretizimin e tij si shef opozite, Basha nuk shihet veçse me syrin e një ‘zeroje ekselente’ që nuk prodhon ngjarje, por pret që ngjarjet ta prodhojnë atë.
Kështu, mes tij dhe Ramës, ndodhi Marrëveshja e dytë politike, 17 maji i dimrit, kësaj radhe pa kamera, shtrëngim duarsh, entuziazëm dhe pritshmëri, përmbyllur me ndonjë qokë a lëshim kompensues. Kësaj radhe kompensimi ishte të pajtuarit në heshtje se tërmeti futi mes dy ushtrive një Pax Albania të dëshiruar. Ironia është se Rama, sërish mund të jetë përfituesi i këtij pakti të heshtur: nëse Kryeministri do të komandojë aksionin e rindërtimit, duke u shfaqur, pa kaluar shumë, me 3D farfuritëse pallatesh dhe lagjesh të reja, cila është ngrehina politike që do të ngrejë shefi i PD?
*bad news is not all bad-lajmet e këqija nuk janë të gjitha të këqija
Financuar Nga Bashkimi Europian
