Sot nis samiti dy-ditor në Bruksel mes vendeve anëtare të Bashkimit Evropian.
Gjatë këtyre dy ditëve, liderët e BE-së pritet të trajtojnë në tryezë një sërë çështjesh të debatuara, mes tyre edhe nisjen ose jo të bisedimeve për anëtarësim me Shqipërinë dhe Maqedoninë e Veriut.
Cilat janë pikat kryesore të axhendës për samitin e 17-18 tetorit
Këshilli Evropian diskuton sot dhe nesër një numër çështjesh të rëndësishme, duke përfshirë Brexit, zgjerimin, Turqinë, buxhetin afatgjatë të BE-së dhe përparësitë për pesë vitet e ardhshme.
Brexit
Kryenegociatori i BE, Michel Barnier do të informojë mbi zhvillimet e intensifikuara me Mbretërinë e Bashkuar gjatë ditëve të fundit.
Zgjerimi i BE-së
Udhëheqësit pritet të diskutojnë për hapjen e bisedimeve të pranimit me Shqipërinë dhe Republikën e Maqedonisë së Veriut.
Pas diskutimeve në Luksenburg mes ministrave të Jashtëm më 15 tetor 2019, Presidenca e Finlandës nxori përfundime procedurale duke vënë në dukje se Këshilli do t’i rikthehet çështjes pas Këshillit Evropian të Tetorit.
Turqia
Udhëheqësit e BE pritet të diskutojnë marrëdhëniet me Turqinë, përfshirë aktet ushtarake në veri-lindje të Sirisë. Më 14 tetor 2019, Këshilli i Çështjeve të Jashtme dënoi veprimin e njëanshëm ushtarak të Turqisë dhe i kërkuan asaj të pushojë dhe të tërheqë forcat e saj.
Buxheti afatgjatë i BE-së
Udhëheqësit do të diskutojnë buxhetin afatgjatë të BE-së, Kornizën Financiare 2021-2027. Udhëheqësit pritet të diskutojnë nivelin e përgjithshëm, financimin, vëllimet e fushave kryesore të politikave, si dhe kushtet.
Axhenda strategjike dhe cikli i ardhshëm institucional
Udhëheqësit do të diskutojnë për një vijim të axhendës strategjike dhe përparësive për BE për vitet 2019-2024. Presidentja e zgjedhur i Komisionit Evropian Ursula von der Leyen do të ftohet të paraqesë përparësitë e Komisionit të ri.
Këshilli Evropian gjithashtu pritet të miratojë një vendim që emëron Christine Lagarde si Presidente të Bankës Qendrore Evropiane.
Klima
Udhëheqësit pritet të flasin për aspektet ndërkombëtare të ndryshimit të klimës, pas Samitit të KB për Veprimin e Klimës dhe përpara Konferencës së Klimës në Santiago de Kili në dhjetor.
Siç është rënë dakord nga udhëheqësit në samitin e tyre në qershor, Këshilli Evropian do të përfundojë udhëzimet e tij mbi strategjinë afatgjatë të BE-së për ndryshimin e klimës në takimin e saj në dhjetor.
Financuar Nga Bashkimi Europian
