Flash News

Posta e mëngjesit/ Me 2 rreshta: Çfarë pati rëndësi dje në Shqipëri

Gjykojeni protestën nga kundërshtarët

Aksident në Greqi, ndërron jetë 16-vjeçari shqiptar

Protesta trazon PS-në/ Zegjineja e ‘meme-ve’ sulmon influenceren: Shëmtirë, diote. Balla kapet me Reuters

Vrasja në Paskuqan/ Autori është gjurmuar deri në Bovillë, ka braktisur mjetin

Bota

Në kohë trazirash për demokracinë dhe ekonominë: Friedrich Merz bëhet kancelari i dhjetë i Gjermanisë, pritshmëritë dhe sfidat

Politiko 6 Maj 2025, 17:29

Në kohë trazirash për demokracinë dhe ekonominë:

Friedrich Merz është zgjedhur zyrtarisht kancelari i ri i Gjermanisë, duke marrë detyrën në një moment vendimtar për vendin dhe për rolin e tij në arenën ndërkombëtare. Pas votimit të dytë në Bundestag, Merz u bë kancelari i dhjetë i Gjermanisë që nga përfundimi i Luftës së Dytë Botërore.

69-vjeçari i Unionit Kristian Demokrat (CDU), i cili fitoi zgjedhjet në muajin shkurt dhe arriti një marrëveshje për krijimin e një qeverie shumicë me Socialdemokratët (SPD), vjen në pushtet pas një periudhe gjashtëmujore ngërçi qeveritar të shkaktuar nga shpërbërja e koalicionit të Olaf Scholz.

“Jetojmë në kohë trazirash të mëdha dhe pasigurie,” deklaroi Merz gjatë firmosjes së marrëveshjes së re qeveritare. Ai theksoi se drejtimi i ri i Gjermanisë duhet të përballet me sfida të jashtëzakonshme, si në planin e brendshëm, ashtu edhe në politikën e jashtme.

Ndër sfidat kryesore është rikthimi i administratës së Donald Trump në SHBA, që ka kërcënuar me vendosjen e tarifave ndaj Bashkimit Europian dhe tërheqjen nga përgjegjësitë tradicionale të mbrojtjes europiane. Ekonomia gjermane, tashmë në stanjacion për shkak të krizës energjetike dhe konkurrencës globale, mund të përballet me një recesion të thellë nëse këto plane amerikanë hyjnë në fuqi.

Merz, i cili ka punuar më parë si këshilltar në sektorin privat dhe është një mbështetës i marrëdhënieve transatlantike, është përballur me kritika por edhe pritshmëri të larta për të sjellë stabilitet dhe një vizion të ri për Gjermaninë. Analistët e shohin emërimin e tij si një sinjal se Berlini është gati të luajë sërish një rol udhëheqës në Europë, pas një periudhe pasigurie nën qeverinë Scholz.

Në planin e brendshëm, Merz ka theksuar nevojën për të frenuar rritjen e partive ekstremiste, si Alternativa për Gjermaninë (AfD), e cila u shpall zyrtarisht si “ekstremiste” nga inteligjenca e brendshme dhe është nën vëzhgim të shtuar. Për të përballuar këto rreziqe, kancelari i ri ka nënshkruar një marrëveshje me SPD-në për të zbutur kufirin kushtetues të borxhit dhe për të rritur ndjeshëm investimet në mbrojtje dhe infrastrukturë.

Ai gjithashtu ka premtuar reformimin e strukturës së sigurisë kombëtare, përmes krijimit të një Këshilli Kombëtar të Sigurisë që do të funksionojë pranë zyrës së kancelarisë dhe do të koordinojë politikat e jashtme dhe të mbrojtjes.

“Gjermania nuk mund të jetë më vetëm një vëzhguese e politikës europiane. Ajo duhet ta udhëheqë dhe ta formësojë atë,” deklaroi ekspertja e politikës së jashtme Jana Puglierin.