“Dekreti i Metës për Xhaferllarin është nul”/ Gjykata Kushtetuese reagon për projekt-rezolutën e miratuar në Kuvend

Gjykata Kushtetuese ka reaguar përmes një njoftimi zyrtar pas projekt-rezolutës të Kuvendit që u miratua në seancën e sotme parlamentare. Sipas kësaj projekt-rezolute, gjyqtarja Marsida Xhaferllari e dekretuar nga presidenti është akt nul, ndërsa Arta Vorpsi bashkë me Elsa Toska dhe Fiona Papajorgji, të votuara në seancën e së hënës duhet të nisin detyrën si anëtare të Gjykatës Kushtetuese.

Në njoftimin e Institucionit të Gjykatës Kushtetuese theksohet se kjo gjykatë nuk ka kuorum për të vendosur për çështjet gjyqësore. Më tej institucioni sqaron se nuk mund të ushtrojë kompetencat  lidhur me zgjidhjen e konfliktit të kompetencave midis pushteteve apo organeve kushtetuese.

Njoftimi i Gjykatës Kushtetuese

Jemi njohur me Rezolutën e miratuar nga Kuvendi i Shqipërisë sot, në datën 15.11.2019, për “Shmangien e krizës kushtetuese me synim legjitimitetin e Gjykatës Kushtetuese – detyrë imperative e organeve më të larta të shtetit”.

Në citim të Kushtetutës, Gjykata Kushtetuese e Shqipërisë zgjidh mosmarrëveshjet kushtetuese dhe bën interpretimin përfundimtar të saj. Gjykata Kushtetuese i nënshtrohet vetëm Kushtetutës.

Për sa më sipër, lidhur me Rezolutën e miratuar nga Kuvendi i Shqipërisë, Gjykata Kushtetuese sqaron se, edhe pas plotësimit të disa prej vakancave në përbërjen e saj, nuk e ka ende kuorumin e nevojshëm për të shqyrtuar dhe vendosur në seancë gjyqësore lidhur me kërkesat që paraqiten përpara saj. Për këtë arsye ajo nuk mund të ushtrojë kompetencat e saj thelbësore apo juridiksionale lidhur me zgjidhjen e konfliktit të kompetencave midis pushteteve apo organeve kushtetuese, si dhe as ato kompetenca që lidhen me shqyrtimin e kushtetutshmërisë së akteve të nxjerra nga organet e pushtetit publik.

Në këto kushte, Gjykata Kushtetuese si një institucion i pavarur, duke zbatuar Kushtetutën dhe ligjin e saj organik dhe legjislacionin në fuqi, si dhe praktikat administrative të ndjekura ndër vite, me qëllim sigurimin e kushteve normale për mbarëvajtjen dhe mirëfunksionimin e veprimtarisë së saj, është duke ndërmarrë të gjitha hapat e nevojshme administrative formale për fillimin e detyrës së tri anëtarëve të rinj, pas betimit të tyre para Presidentit të Republikës.

“Dekreti i Metës për Xhaferllarin është nul, Vorpsi të nisë detyrën”, miratohet projekt-rezoluta për Kushtetuesen, opozita e re bashkon votat