“Dështimin e tij po përpiqet t`ua hedhë shkodranëve”, Voltana Ademi: Rama dërgoi Lleshajn për të sulmuar qytetarët

Kryetarja e Bashkisë së Shkodrës Voltana Ademia në një dalje për mediat akuzoi kryeministrin Rama se “dështimin e tij për menaxhimin e situatës” po përpiqet “t`ua hedhë qytetarëve të Shkodrës”. “Sot Edi Rama dërgoi në Shkodër gjeneralin pa spaleta që ka vënë në krye të Ministrisë së Brendshme për të sulmuar shkodranët. Dështimin e tij edhe në menaxhimin e një situate të rrezikshme dhe që lidhet direkt me jetët e shqiptarëve, Rama po përpiqet t’ua hedhë qytetarëve të Shkodrës. Është një strategji e ulët e qeverisë, deri në kriminale, të cilën unë e kam denoncuar publikisht prej ditësh. Kryeministri, përmes ministrit të tij të brendshëm, po mundohet të fshehë dështimin në hetimin epidemiologjik dhe në testimin e qytetarëve, në përballimin e krizës shëndetësore dhe ekonomike”, u shpreh Ademi.

Më tej, ajo shtoi se bashkitë nuk kanë asgjë në dorë për kryerjen e testimit apo hetimit epidemiologjik, ndërsa theksoi se institucioni që ajo drejton ka qenë bashkëpunues. “Është botërisht e ditur se në këtë situatë, as përsa i përket testimit e as hetimit epidemiologjik, e as sistemit shëndetësor, bashkitë nuk kanë asgjë në dorë. Bashkia e Shkodrës ka bashkëpunuar dhe ka bërë gjithçka që ka në dorë, në mundësitë e kapacitetet e veta, për lehtësimin e barrës së COVID-19 për qytetarët e saj dhe do të vazhdojë ta bëjë atë pa ndërprerje. Shkodra është një nga qytetet që  me qytetarinë e vet ka bërë dhe po bën përpjekjen e saj për respektimin e masave të distancimit social, pavarësoisht problemeve shumë të mëdha ekonomike”, tha Ademi.

Sipas saj, familjet e infektuara kanë telefonuar prej ditësh 127 por u është refuzuar testimi. Ndërsa akuzoi se “të shtunën humbi jetën një person për shkak të neglizhencës”. “Rama e sejmeni i tij që kishte ardhur me një mision të caktuar politik në Shkodër, e dijnë mirë se janë familje të e familjarë që kanë patur kontakte me të infektuar, e të tjerë që prej ditësh kanë telefonuar numrin 127,  dhe që u është refuzuar testimi. Ai e di mirë se një person, të shtunën, ka humbur jetën në Spitalin e Shkodrës, pa mundur as të dërgohet në Tiranë për shkak të neglizhencës, duke ngjallur panik dhe pasiguri tek stafet mjekësore e pacientët e spitalit. Edi Rama e di mirë se shkodranët nuk kanë marrë asnjë pagesë nga fondi i deklaruar për situatën e Fatkeqësisë Natyrore, u është shkurtuar numri i familjeve me ndihmë ekonomike, iu dha vetëm një muaj ndërsa iu premtuan dy muaj pagesë, u janë sjellë deri tani 200 pako ndihmë ushqimore për 250 mijë banorë”, tha ndër të tjera Ademi.

Ajo i bëri thirrje Kryeminisrit të mos përdor Sandër Lleshajn për të sulmuar qytetarët e Shkodrës, ndërsa tha se qytetarët i kanë respektuar masat. “Nëse qytetarët në Shkodër nuk do të respektonin masat kufizuese ashtu siç u përpoq sot ta faturonte Rama edhe Lleshaj, nga kryeministri dhe i gjithë shteti nuk do të merreshin tre ditë me Tregun e Kombinatit në Tiranë.  Nuk ka nevojë që Rama të shpikë ndonjë armik tjetër. Për Shkodrën, shkodranët e shqiptarët armiku i vetëm është i mjaftueshëm COVID-19. Siç e kam kërkuar disa herë, edhe sot kërkoj që të rritet numri i testeve për qytetarët, për të identifikuar dhe shkëputur zinxhirin e infeksionit në Shkodër. Po kaq emergjente është edhe mbështetja financiare dhe ushqimore, pasi qytetarët janë në vështirësi të sigurimit të bukës së përditshme”, shtoi Ademi. Ajo i bëri thirrje qeverisë t`i vijë në ndihmë qytetarëve të Shkodrës, ndërsa qytetarët i apeloi për respeptimin e masave të distancimit social.