“Idiot, foltore, budalla”, maxhoranca fyen opozitën në Kuvend, asnjë masë ndëshkuese për socialistët

Seanca e sotme plenare është shoqëruar përveçse me akuza, me një gjuhë fyese dhe linçuese nga maxhoranca kundrejt opozitës.

Ishte fillimisht kryeministri Edi Rama i cili iu drejtua kolegëve demokratë me termat “foltore dhe gojore”, për të vijuar më vonë me “kocka të bluara”, “varre”, “heshta”, fjalor ky që u pasua nga të vetët.

Debati i fundit nisi pas interpelancës që deputeti demokrat Agron Shehaj kishte kërkuar me ministren e Turizmit dhe Mjedisit Mirela Kumbaro lidhur me ndërtimin në zonat e mbrojtura. Gjatë fjalës së tij nga foltorja e Kuvendit, Shehaj iu referua koncesionit të Parkut Kombëtar të Butrintit, duke hedhur akuza të përdorura edhe më parë se pas këtij projekti fshihen kushërinjtë e Damian Gjiknurit.

“Mos vini këtu duke na bërë moralin e duke thënë Mos i ngatërroni hajdutët me sipërmarrësit. Mos na bëni moral tani mbi sipërmarrësit e ndershëm. Dilni ju garant për ‘Alb Starin’ apo për Gjiknurin. Çfarë prova do më shumë moj zonjë…Adresa e andi shpk., është shpallur investitor strategjik. Paratë që vidhni janë paratë e qytetarëve. Ky është thelbi. Çfarë dreqin do më shumë ti…E keni parë inceneratorin apo jo, po aty nuk po vidhen me qindra mijëra euro. Bëhuni seriozë”, tha ai.

Nga ana tjetër, Gjiknuri në replikën e tij ndaj Shehajt, iu drejtua demokratit njësoj si Rama me fjalor fyes duke e quajtur atë “idiot të dobishëm” që sipas tij demokratët po e përdorin atë dhe paratë e tij.

“Unë do ta quaja idiot i dobishëm. Thërret ministren për shpjegime. Ti zotëri për këto budallallëqe që ti thua që merresh me kushërinjtë e mi. Ti je në Gjykatë të Tiranës për këtë çështje dhe ke marrë një njoftim se nuk ke paraqitur prova. E para ai nuk është djali i xhaxhait tim. Tani t’i para ke. Ty ta ngrenë topin dhe të marrin paratë. Atë punë ke ti…Për këtë çështje takohemi bashkë në Gjykatë. Të kanë gjetur me para dhe të përdorin”, tha Gjiknuri.

Ishte më pas deputetja demokrate Dhurata Çupi e cila mori fjalën duke i kërkuar llogari kryetares së Kuvendit, Lindita Nikolla, se përse nuk ka marrë asnjë masë dhe nuk ka reaguar ndaj fyerjeve që i janë adresuar opozitës sot thuajse në të gjithë seancën plenare.

“Këtu është një vend i shenjtë. Kemi ardhurpër të mbojtur interesat e qytetarëve. Dhe është e padrejtë nga ana juaj kryetare që nuk reflektoni ndaj fyerjeve që janë bërë sot nga ora 10 kundrejt opozitës. Budalla, idiot, nuk po i përmend ato të tjerat. Dhe ju nuk keni bërë asnjë reagim. A ju duket e drejtë ju zonja kryetar? Janë thënë disa herë fjala budalla, idiot. Ju duket dinjitoze zonja kryetare që nk reagoni? Ju duket dinjitoze që kryeministri shan deputetët e opozitës. Si ka mundësi që nuk reagoni ju si zonjë?”, tha Çupi.

Por Nikolla u shpreh se reagimi i demokrates ishte i pavend, duke deklaruar se ishte Shehaj ai që kishte thyer rregulloren duke përdorur fjalë fyese si “hajdut”, “vjedhje” dhe “kriminel”.

“Faleminderit për vëmendjen dhe reflektimin. Por e gjej të pavend këtë ndërhyrjen tuaj në këtë moment. Mos kërceni përpjetë se nuk mbarova. Se në tërë ligjëratën tënde ke përmendur fjalën hajdut kriminel. Në tërë fjalën tënde ke përdorur vetëm fyerje. Vjedhje, hajdut, kriminel ke përdorur në fjalën tënde. Dhe kur përdor këto fjalë patjetër ti ke thyer i pari etikën dhe do presësh reagime”, u shpreh Nikolla.