“Fabrikë për prodhimin e vaksinave”, si po ndjek Rama modelin e Vuçiç

Pas kthimit nga Turqia së bashku me 192 mijë vaksina kineze dhe marrëveshjen për 1.2 milionë doza në total, kryeministri Edi Rama theksoi se kanë nisur bisedimet për hapjen në Shqipëri të fabrikës së prodhimit të vaksinave kineze.

“Kemi nisur bisedat për të sjellë në Shqipëri fabrikën e prodhimit të vaksinave. Një fabrikë e një teknologjie të lartë, e cila aktualisht është një nga kompanitë më të mëdha në botë, kompania farmaceutike që bën edhe distribucionin e vaksinës Sinovac.

Kjo fabrikë prodhuese, e cila do të hapë një tjetër faqe të rëndësishme në zhvillimin e sektorit të shëndetësisë në Shqipëri, e cila do të jetë një pikë referimi për prodhime të cilësinë më të lartë”, u shpreh Rama nga Rinasi.

Ashtu siç ‘ktheu sytë’ nga rusët dhe kinezët për vaksinat e prodhuara prej tyre, Rama duket se po ndjek të njëjtin model si të Aleksandar Vuçiç edhe për fabrikën e prodhimit, presidentit serb me të cilin kreu i qeverisë njihet për miqësinë mes tyre.

Ndërsa në Tiranë, Edi Rama fliste për lojë me dy porta të cilën ai nuk ishte i gatshëm ta luante, kujtojmë se Serbia në fund të 2020-ës dhe në fillim të këtij viti , Serbia vend që gjithashtu është në negociata anëtarësimi me Bashkimin Europian, njoftoi se do të përdorte edhe vaksinat ruse e kineze.

Dy akte normative të pak ditëve më parë të qeverisë rrëzuan të gjithë pohimet që kishte bërë më parë Rama mbi prejardhjen e vaksinave. Nga një vend që do t’i qëndronte besnik BE-së edhe përsa i takon blerjes së dozave anti-covid, tashmë shteti shqiptar u bë i hapur edhe ndaj lindjes duke ndjekur të njëtin model si Serbia, ndonëse me disa muaj vonesë.

Ky model tashmë duket se po vijon edhe me projektin e radhës, atë të prodhimit të vaksinës po kineze në Shqipëri.

Në 12 mars, Vuçiç deklaroi se në Serbi do të ndërtohet së shpejti një fabrikë e Sinopharm (kineze) për prodhimin e vaksinave kundër Covid-19.

“Nga 15 tetori ne do të kemi sasi të mëdha vaksine për vete dhe mbarë rajonin. Ne do të duhet të furnizojmë edhe rajonin të paktën me çmimin e prodhimit. Shpresoj se Serbia nuk do të bezdisë kënd në këtë drejtim”, tha Vuçiç.

Ndërkohë, kryeministri i pyetur të enjten në Opinion lidhur me këtë krahasim, Rama tha se nuk është e njëjta gjë.  

“Nuk është e njëjta gjë, sepse Serbia ka një bazë të kahershme të industrisë farmaceutike në Europë. Bëhet marrëveshje me prodhuesin turk që është një kompani e vjetër dhe me reputacion që prodhon disa lloj vaksinash. I kam kërkuar që të vijnë në Shqipëri të hapin një fabrikë të tyren sepse kanë probleme me licencat e importeve dhe nëse u krijojmë një kornizë të favorshme nga pikëpamja fiskale. Komunikova me pronarin që është shkencëtar dhe fabrika do vijë këtu. Do jetë investim i tyre me mbështetje të qeverisë. Ne do ua subvencionojmë një pjesë të investimit”, tha Rama.

Kontakto me Politiko në rast se: Mendoni se nuk shkruajmë Shqip Mendoni se kemi bërë shkelje etike Mendoni se kemi bërë CopyPaste Mendoni se kemi bërë FakeNews Doni të postoni nje Lajm