Nga Didi, Veliu te Nano, asnjë nga drejtorët e Policisë së Shtetit nuk përfunduan mandatin gjatë qeverisjes ‘Rama’

Që nga 2013-ta, kohë kur Ps mori pushtetin e deri më sot janë ndërruar katër drejtorë të përgjithshëm të Policisë së Shtetit.

Ndonëse ky post ka një mandat 5-vjeçar, asnjëri prej tyre nuk e ka përfunduar të plotë. Disa janë njoftuar si të dorëhequr, disa të shkarkuar.

I pari ishte Artan Didi. Ai e mbajti këtë detyrë nga tetori 2013  deri në 31 mars 2015. Ai njoftoi dorëheqjen, pa u shuar ende zhurmat për mos ekzekutimin e urdhër arrestit për Mark Frrokun, një shkresë që u harrua në tavolinat e Policisë së Shtetit.

Me dorëheqje u largua edhe Haki Çako, një oficer policie që kishte prekur disa komisariate dhe së fundmi edhe drejtor i policisë së Lazaratit që siç duket spikati gjatë rënies së këtij fshati dhe mori stafetën në prill 2015 deri në janar 2018, ku u lirua mbas dorëheqjes kur ministër i Brendshëm ishte Fatmir Xhafaj.  

Çako u zëvendësua për një periudhë tranzitore nga Rebani Jaupaj që qëndroi i komanduar derisa me propozim të Xhafës, mori drejtimin e policisë shqiptare Ardi Veliu, që ishte kataplutuar nga policia rrugore.

Por edhe për Ardi Veliun, emërimi zgjati nga 2018 deri në fillim të tetorit 2021. Lirimin e karriges Veliut iu kërkuar shpesh herë për shkak të skandaleve që ndodhën gjatë mandatit të tij si vrasja e Klodian Rashës, protestat e dhunshme, akuzat e tij ndaj një nënës së një të mituri etj.

 Ndërkohë sot, qeveria vendosi të shkarkojë Drejtorin e Përgjithshëm e Policisë së Shtetit Gledis Nano. Karriera e Nanos si kreu i policisë zgjati thuajse një vit.

Kujtojmë se me ngjarjen e rëndë të ndodhur në plazhin e Potamit në Himarë disa javë më parë, ku ish-efektivi Arjan Tase përplasi për vdekje me skaf 7-vjeçaren Jonada Avdia, qytetarët kanë kërkuar dorëheqjen e Drejtorit të Përgjithshëm të Policisë së Shtetit. Bashkë me të kërkuan edhe largimin e ministrit të Brendshëm Bledi Çuçi dhe ministres së Turizmit dhe Mjedisit Mirela Kumbaro.

Artan Didi :  Tetor i vitit 2013- 15 shkurt 2015

Haki Çako: 15 shkurt 2015- 8 janar 2018.

Ardi Veliu: Nga 5 shkurt 2018-5 tetor 2021

Gledis Nano: 6 tetor 2021-Nga 31 gusht 2022