Rama blindoi kryeministrinë dhe iku nga Tirana, protesta e opozitës u mbyll paqësisht pa asnjë incident

Dy orë protestë kombëtare me një pjesëmarrje masive nga e gjithë Shqipëria nisi dhe përfundoi në mënyrë paqësore në bulevardin ‘Dëshmorët e kombit’ kundër qeverisë së Edi Ramës.

Ndonëse kryeministria dhe kryesia e kuvendit u blinduan disa orë para protestës, në protestën kombëtare të thirrur nga opozita dhe shoqëria civile nuk u shënua asnjë incident.

Siç u pa nga videot, protesta mblodhi mijëra qytetarë, të Tiranës, aktivistë të shoqërisë civile, të ardhur nga të gjitha rrethet e vendit, por edhe emigrantë nga diaspora.

Qytetarët mbushën bulevardin, ndërsa ‘lumi’ i protestuesve arrinte deri në sheshin ‘Skënderbej’.

Ajo zgjati dy orë aq sa PD kishte kërkuar leje, ndërsa në podiumin e instaluar që mbrëmë mbajtën fjalime rreth 20 persona, 5 deputetë përfshirë kreun e PD, Sali Berisha dhe kryetaren e LSI, Monika Kryemadhi, ndërsa pjesa tjetër ishin qytetarë dhe përfaqësues të kauzave të shoqërisë civile.

Mesazhet e Berishës

Kreu i PD Sali Berisha mbajti i fundit fjalën e tij, duke shënuar edhe mbylljen e protestës.

Berisha i përcolli disa mesazhe kreut të qeverisë Edi Rama, duke e cilësuar si armik dhe se i ka orët e numëruara në pushtet.

Berisha i bëri thirrje BE që të hapë sa më parë negociatat me Shqipërinë, ndërsa kundërshtoi sërish nismën e Open Balkan.

Beria iu drejtua Ramës, duke e akuzuar se ka përdorur tendera për të blerë mediat.

Deputetët kritikë në protestë

Veç qytetarëve, pjesë e protestës ishin edhe deputetët Dhurata Çupi, Grida Duma, Jorida Tabaku, Alfred Rushaj, Dash Sula dhe Xhelal Mziu, dikur mbështetës të Lulzim Bashës.

Pankartat pikante

Ashtu si në çdo protestë, ajo që tërheq jo pak vëmendjen janë edhe pankartat me të cilat qytetarët përcjellin kauzat e tyre.