“Kam informacione brenda PS-së”, Meta thirrje komisionerëve të opozitës: Mbroni votat e kandidatëve socialistë

Presidenti Ilir Meta në një dalje për median (ashtu siç e ka bërë të përditshme) ka reaguar për disa çështje, që në thelb kanë zhvillimin e zgjedhjeve të rregullta e të ndershme.

Presidenti Meta i bëri thirrje komisionerëve të opozitës që të mbrojnë votat e kandidatëve të PS-së , pasi siç shprehet ai, sipas burimeve që ka nga brenda PS, po zhvillohet një luftë e ashpër mes kandidatëve për  të marrë votat e njëri-tjetrit.

THIRRJA PER KOMISIONERET

“I bëj thirrje komisionerëve, se ata përfaqësuesit e opozitës jo vetëm kanë për detyrë të mbrojnë çdo votë të opozitës, kanë për detyrë që të mbrojnë votat siç do ti japë populli edhe për kandidatët e PS. Pas përfundimit të mandateve për partitë, ekziston mundësia që opozita nga euforia e fitores të nënvlerësojnë procesin tjetër. Brenda PS kam informacione se kandidatët kanë luftë të madhe për të marrë votat e njëri-tjetrit. Sepse vendosja e emrave në listë ka qenë për qëllime të tjera dhe në këtë kuadër përgatiten për të kapur njerëz të opozitës me qëllim që këta të tolerojnë tek numërimi i votave të kandidatëve të PS. Ky do të ishte një gabim i rëndë. Cdo votë duhet të dalë sic është”, u shpreh Presidenti.

NDALIMI I VOTËS SË EMIGRANTËVE

“Të nderuar qytetarë ndalimi i votimit të emigrantëve përbën një akt të dhunshëm dhe antikushtetues të ndalimit të së drejtës për të zgjedhur dhe për t’u zgjedhur, arsyetimi i ndalesës së mijëra bashkatdhetarëve për të mos marrë pjesë në zgjedhje për shkak të pandemisë është farsë", tha Meta.

MANIPULIMI I ZGJEDHJEVE

Gjatë konferencës së jashtëzakonshme me gazetarët, Kreu i Shtetit u shpreh se qeveria po përdor shumë marifete për të manipuluar zgjedhjet në 25 prill, duke penguar emigrantët apo edhe personat e infektuar me Covid.

“Unë i referohem një informacioni konkret teknik për njësinë 10 që mora, dhe informacione të tjera se këtu vijnë video, regjistrime, përgjime i dërgojnë qytetarët dhe do të shikoni shumë prej tyre.

Unë i referohem një denoncim konkret nga një qytetar për rrezikun e ndërhyrjes tek njësia 10 ku do bëhet votimi elektronik. Me metoda të cilat unë nuk jam i kualifikuar, për t'i vlerësuar por sipas ekspertëve të ID janë të mundshme. Celibashi ka dhënë siguri se kjo nuk ndodh. Por kam informacion se ka përpjekje për këtë çështje. Edhe përpjekja për të penguar emigrantët është përpjekje për të përdorur emrat e tyre apo edhe përpjekja për të mos lejuar ata që vuajnë nga pandemia për të mos votuar është një përpjekje tjetër për të bërë marifete, që besoj edhe këtë përpjekje opozita e ka të qartë”, tha Presidenti.

DIPLOMATË TË KORRUPTUAR?

"Ndërkombëtarët e kanë bërë të qartë se pa zgjedhje të lira e të ndershme se Shqipëria nuk hyn në Europë. ndërkombëtarët janë shumë të respektuar. Zgjedhjet do t’i mbrojnë shqiptarët. Zgjedhjet kanë vetëm një rrezik dhe ai është Edi Rama, një kuisling që kurdiset jashtë Shqipërisë për të çkombëtarizuar vendin tonë për ta shpopulluar atë", tha Meta.

TAKIMI ME ZYRTARË TË OFL?

Presidenti Ilir Meta  në një dalje për median ka folur me tone të ashpra ndaj deklaratave të bëra në media për takimin e tij me subjekte të OFL.

E pyetur nga gazetarja e Fax NeWs se kë ka takuar, veshur me kapuç te Gjiri i Lalëzit, Meta mohoi të kenë qenë subjekte të OFL-së.

Pyetje-Përgjigje:

Kush janë personat me të cilat je takuar?

Ai që ta ka thënë ty këtë gjë le të vijë të ma thotë mua këtë gjë. Kam kaq muaj që pres kryeministrin të ma thotë. Më dëgjo mua më vëmendje! Unë  e përdor kapuçin sepse pasi bëj sport bëj dhe sauna. Dhe fryn erë, jam i detyruar të përdor kapuç. Kjo është arsyeja. Të vijë kryeministri këtu.

Dukeqenëse flini me kushtetutën, respektoni nenin 10 për lirinë e shprehjes.

Unë respektoj lirinë time për të veshur kapuç. Si përket personit le të vijë personi këtu.

Me kë jeni takuar?

Unë takohem me gjithë Shqipërinë por kurrsesi me ata që janë në kërkim.

Kanë qenë subjekte të OFL?

Zero!  Zero! Zëro! ...dhe OFL do të nis punë me ritëm të paparë me 26 prill. Asnjë ligj i reformës në drejtësi nuk do të preket. pa merak.

META I  ZGËNJYER NGA SPAK? 

"Nuk pres asnjë rezultat sepse janë trefishuar rastet e denoncimeve në krahasim me zgjedhjet e tjera. Por unë jam i bindur se populli i Shqipërisë mezi po pret do të vërshojë drejt kutisë së votimit dhe sovrani do të marrë të gjitha fuqitë.

Edhe nëse nuk i arreston policia, do t’i arrestojë populli. Sepse duhej ta kishte sekuestruar policia furgonin në Berat..."

KËSHILLA PËR KEJDI MEHMETAJN

Presidenti Ilir Meta i bëri sërish thirrje kandidatëve të LSI-së të mos bien pre e provokimeve, duke theksuar se problemi kryesor nuk është kjo çështje. Gjatë konferencës për media ai tha se me incidentin e banderolave në Fier, socialistët kërkojnë që të thuhet se LSI prishi takimin elektorak të kryeministrit Edi Rama.

"I dhashë këshillë zonjës Kejdi, sepse si president i Republikës kam detyrë të shpëtojmë zgjedhjet e 25 prillit. Nëse do të hyjmë në lojërat që bën i marri i rilindjes do ishte gabim i madh dhe ftoj të githë mos bëjnë lojën e tij qoftë dhe pa dashje".

“Ftoj kandidaten e LSI, Kejdi Mehmetaj, dhe të gjithë kandidatët e tjerë të mos bien e këtij provokimi të bandës Rilindje. Ky është një incident i turpshëm dhe banal, por edhe një provokim Kejdi, që ju gjoja të prishni mitingun që do bëjë Rilindja sot në Fier", tha Meta.

Ai shtoi se kryebashkiaku i Fierit, Armando Subashi do të shkojë në burg për shkeje të rënda që ka konsumuar. Meta bëri një thirrje edhe për fierakët.

"Nuk është beteja juaj për të mbrojtur banderolat e LSI nga kryetari i Bashkisë i cili do të shkojë në burg.I di Fieri të gjitha historitë e kryebashkiakut dhe rilindasve të tjerë, e do t’i ndëshkojë me votë plebishitare. U bëni thirrje gjithë grave e burrave të Fierit e Mallakastrës t’i mprehin sfurqet, kosoret, sëpatat, t’i kenë gati ditën e diel e po u prek një votë e vetme, ashtu do bëjë gjithë Shqipëria, me në krye Presidentin”, tha Meta.