Reforma në Drejtësi, një nga pikat kyçe të integrimit në BE dhe mosfunksionbaliteti i Gjykatës Kushtetuese dhe asaj të Lartë është një nga temat më të ‘nxehta’ të debatit politik prej muajsh në vend.
Por, përfaqësues të qeverisë duke dashur të ‘zbusin’ situatën, nuk kanë ngurruar edhe të bëjnë premtime publike se Gjykata Kushtetuese kryesisht do të jetë funksionale së shpejti.
Instituti i Studimeve Politike ka mbledhur të gjitha premtimet e bëra, kryesisht nga Ulsi Manja, nën cilësinë e titullarit kryesor institucional në parlament për ecurinë e Reformës në Drejtësi, drejtuesin e Komisionit të Ligjeve.
Sipas ISP, Manja në 6 muajt e fundit ka bërë tri premtime, asnjë e mbajtur për ristrukturimin e Gjykatës Kushtetuese.
“Premtimi i parë, – Gjykata Kushtetuese do të jetë brenda muajit mars 2019 u bë në nëntor 2018. Premtimi i dytë, – Gjykata Kushtetuese do të plotësohet brenda muajit qershor, – u bë në prill 2019 dhe në fjalimin në Kuvend në maj 2019. Premtimi i tretë, i bërë javën e kaluar e shtyn afatin e zgjedhjes së Gjykatës Kushtetuese nga marsi në 20 korrik 2019. Dhe me siguri, as ky nuk është premtimi i tij i fundit.
- “Brenda tre mujorit të parë të vitit 2019 ne do kemi Gjykatë kushtetuese. Në mars besoj gjithçka do jetë e zgjidhur” (Ulsi Manja, Debati në Channel One, 6 nëntor 2018).
2. “Unë duke njohur procesin dhe mekanizmin ligjor jam besimplotë që Gjykata do të plotësohet me numrin e nevojshëm të anëtarëve brenda qershorit”. (Ulsi Manja, “Tempora” në RTV Ora, 23 Prill, 2019).
3. “Brenda qershorit 2019 ne do të kemi të plotësuara vendet vakante në Gjykatën Kushtetuese, por edhe Inspektorin e Lartë të Drejtësisë” (Ulsi Manja, fjalim në Kuvend, 8 maj 2019)
4. “Unë them që jo brenda Korrikut po e po, por unë shpresoj që brenda 20 Korrikut ta kemi funksionale Gjykatën Kushtetuese” (Ulsi Manja, “Provokacija”, 31 maj 2019)”, sqaron ISP.
Discussion about this post