KLP dërgon listën në Kuvend, brenda 30 ditësh Shqipëria me kryeprokuror të ri

Duke nisur nga sot, brenda 30 ditësh vendi do të ketë kryeprokurorin e ri me mandat 7-vjeçar.

Këshilli i Lartë i Prokurorisë i dërgon sot Kuvendit listën me 3 kandidatët e renditur në bazë të pikëzimit.

I pari rendit prokurori Olsian Çela, i cili përflitet edhe si më favoriti në këtë garë, duke u ndjekur nga Arta Marku, kryeprokurorja e përkohshme dhe më pas Fatjona Memçaj.

Lista i niset Kuvendit në kushtet kur asnjë prej kandidatëve nuk ankimon renditjen, ndonëse pak ditë më parë Arta Marku kërkoi prej Këshillit pikëzimin e detajuar.

Kështu, Kuvendi do të votojë një nga emrat e dërguar nga KLP për kryeprokurorin e ri me një shumicë prej 84 votash.

Në rast të dështimit brenda afatit 30 ditor të votimit në Kuvend, atëherë lista i dërgohet sërish KLP dhe kandidati i renditur i pari zgjidhet automatikisht kryeprokurori i ri.