Malaj: Të dëmtuarit që i kanë marrë shtëpitë me kredi, i kanë banesat e siguruara

Ish-ministri i Financave, Arben Malaj, deklaroi se të dëmtuarit nga tërmeti të cilët e kanë marrë shtëpinë me kredi, duhet që të ndihen të qetë, pasi siguracioni u garanton dëmshpërblim 100%.

Gjithashtu, ai këshilloi të gjithë qytetarët, të cilët hasin probleme me bankën private, që t’i drejtohen asaj qendrore.

“Kush ka ankesë për shërbimet financiare duhet t’i drejtohet Bankës së Shqipërisë, por edhe të na vënë në dijeni. Të gjithë ata që kanë marrë kredi për shtëpi duhet të dinë se banesat e tyre janë të siguruara.

Tërmeti më i madh që po na vret deri tani është tërmeti i frikës, kultura jonë e sjelljes duhet të ndryshojë, sepse nëse njerëzit kanë krize psikologjike, kjo duhet të menaxhohet. Duhet një ndihmë financiare e menjëhershme që qeveria e bëri. Të krijohet solidariteti social që asnjë të mos vuajë, institucionet të fokusohen aty ku ka ndodhur fatkeqësia”, deklaroi Malaj për Abc news.

Ai gjithashtu ka një kërkesë për shoqatën e Bankave.

“Duhet që të nxjerrin njoftime edhe më të qarta, të sqarojnë çdo qytetar. E vetmja gjë e rëndësishme  është të krijojmë një realitet të ri ekonomik dhe social”.